«Азаронак — выдатны журналіст». Намеснік міністра інфармацыі пракаментаваў стрымы Азаронка
Блогер Андрэй Павук паспрабаваў паскардзіцца на прапагандыста ў Міністэрства інфармацыі.
Вытрымкі з размовы з намеснікам міністра інфармацыі Дзянісам Язерскім апублікавалі ў канале «Рудабельская паказуха» і на Белсаце.
У Язерскага паспрабавалі даведацца, куды можна скардзіцца, калі журналіст падае дэзінфармацыю ці нецэнзурна выказваецца.
«У нас ёсць Адміністрацыйны кодэкс. Калі ласка, заяву ў міліцыю. (…) У журналіста, як і любога работніка, ёсць наймальнік. Вы маеце поўнае права ў тым ліку звярнуцца і да наймальніка, калі вы лічыце ганебнымі паводзіны ці выказванні той ці іншай асобы», — адказаў чыноўнік.
Калі ў намесніка міністра запыталі наконт паводзін прапагандыста СТБ Рыгора Азаронка на стрымах, той заўважыў:
«Гэта яго асабістая тэлеграм-суполка ці ютуб-канал. Чалавек мае права зрабіць».
«Азаронак выдатны журналіст. З майго пункту погляду», — выказаўся пасля чыноўнік.
Ён таксама перапытаў: «А што, на тэлеграм-канале СТБ вы чуеце фэйкі і дэзінфармацыю? Гэта выключана цалкам».
«Калі вы лічыце, што на гэтым тэлеграм-канале СТБ ці іншага дзяржСМІ вы пачулі фэйк ці дэзінфармацыю, значыць у вас няправільны светапогляд у частцы той інфармацыі, якую вы палічылі фэйкавай», — давёў сваю пазіцыю Язерскі.
Нагадаем, у нядаўнім стрыме Азаронак абрынуўся на беларусаў, якіх хвалююць цэны на бульбу.
«Задзяўблі сваёй бульбай. Жэрці і жэрці абы, і толькі ныць з гэтай нагоды», — дзікім крыкам закрычаў Азаронак.
Каментары