Байкер з хвастом. Брэсцкі джэк-расэл на матацыкле стаў зоркай TikTok
Год таму Дзмітрый Кугаль завёў акаўнт для свайго гадаванца, і зараз джэк-расэл-тэр’ер Джэкі — «галоўны байкер Брэста» і зорка TikTok, піша Onliner.by.
Без яго не праходзіць ніводны буйны байкерскі праект: Джэкі ў шлеме, сабачай касусе і крутых матацыклетных акулярах імчыць сярод першых людзей калоны. Камера, усталяваная на ветравым шкле матацыкла гаспадара, піша гісторыю Джэкі ў рэжыме нон-стоп.
Калі хто-небудзь падыходзіць да сабакі-байкера, каб пагладзіць, адразу трапляе ў «кіно». Дарэчы, гладзіць Джэкі можна без боязі: наш герой валодае даволі высакародным характарам.
«Ён тут жыць не будзе!»
— Сабака з’явіўся ў нашым доме 24 лістапада 2022 года, калі ў майго сына быў дзень нараджэння, — распавядае Дзмітрый. — Хацелася зрабіць дзіцяці сюрпрыз. Знайшоў заводчыцу ў Баранавічах, і яна мне сказала, што ёсць адзін спакойны хлопец.
Я паехаў у Баранавічы менавіта па яго. Кажуць, сабака сам выбірае гаспадара: да мяне пачаў прыставаць іншы шчанюк, спрабаваў сцягнуць з мяне шкарпэткі.
А Джэкі сядзеў у баку. Але я адчуваў, што прыехаў менавіта па гэтага, які саромеўся падысці. Купіў яго, цішком ноччу прыехаў дадому… Жонка ўстроіла скандал: «Ён тут жыць не будзе!»
Раніцай давялося ўзяць сабаку ў офіс — добра, што я сам сабе дырэктар. І з таго моманту Джэкі са мной 24/7. Прайшло два гады.
— Джэкі спіць у нагах гаспадара ў ложку. Жонка? І для яе ён — «найлепшы сабачка». Канечне, кінолагі не рэкамендуюць дазваляць сабакам класціся ў ложак, але ўсе сабачнікі ведаюць, як гэта адбываецца.
Разумнасць джэк-расэл-тэр’ераў — адна з найбольш распіяраных якасцяў пароды. Пры ўсім сваім адметным характары, Джэкі гэтую прыродную рысу цалкам пацвярджае. З самага дзяцінства ён займаецца з кінолагам, ведае больш за 30 каманд. Нам прадэманстраваў самыя цікавыя: на задніх лапах з адданым выразам морды — «служы», з рашучым выглядам і лапамі на руцэ гаспадара — «тач».
Джэкі штодня ездзіць з гаспадаром на працу — Дзмітрый валодае фотастудыяй, якая займаецца не толькі здымкамі, але і паліграфіяй, сувенірамі. Тут у Джэкі — сваё месца, дзе ён назірае за працэсам па 8—12 гадзін запар. Бывае, у Дзмітрыя няма часу нават паабедаць або вывесці гадаванца на вуліцу — у такія дні Джэкі цярпліва чакае. Але зрываецца з месца, калі чуе: «Паехалі!»
«Паехалі!»
— Мне заўсёды хацелася мець тэхніку для душы. Машыну разглядаў толькі як сродак перамяшчэння. А вось матацыкл — зусім іншае, — кажа Дзмітрый.
— Чатыры гады таму купіў новы Minsk X 250. Падрыхтаваў яго вельмі якасна, грошай не шкадаваў, думаў доўга на ім катацца. Паехаў у падарожжа па Беларусі, накатаў 5000 км. Кожны вечар сядзеў над картамі — шукаў розныя маршруты. І праз два месяцы зразумеў, што «Мінска» не хапае — хуткасць невялікая, камфорту мала. І купіў Honda Varadero.
Вось на гэтым байку Джэкі і стаў зоркай TikTok.
Як пасадзіць сабаку на матацыкл?
Першае, што было неабходна, — асобнае месца. У Еўропе прапануюць гатовыя варыянты за 400 еўра. Дзмітрый жа вырашыў знайсці майстра ў байкерскай групе. Знайшоўся чалавек, які шые кофры для матацыклаў.
Сабачых сумак ён ніколі не рабіў, але рызыкнуў. Спачатку зрабілі па памерах пса каробку, па гэтых лякалах пашылі торбу — з высокімі бортамі, але досыць мяккую. Атрымалася каля 200 рублёў, але галоўнае — Джэкі «матацыклетнае месца» адразу прыняў за сваё.
Навошта манетызаваць TikTok сабакі-байкера?
— Год таму захацелася стварыць старонку Джэкі ў TikTok і весці яе ад імя сабакі, — успамінае Дзмітрый. — Яго гісторыі прыдумваю, зыходзячы з тых падзей, якія з ім адбываюцца. Знайшоў праграму, якая змяняе голас, і цяпер Джэкі гаворыць «па-людску». На матацыкле, побач з яго сумкай, пастаянна працуе камера з дыяпазонам 360 градусаў.
Я магу адысці ў краму, напрыклад, а Джэкі спакойна сядзіць у сваёй сумцы. Але людзі самі пастаянна цягнуцца да яго, хтосьці хоча трапіць у кадр зоркі TikTok. Многія ведаюць Джэкі па сацсетках, падыходзяць як да старога сябра.
Гаспадар апэўнівае, што людзі з усяго свету пішуць Джэкі:
— Калі паведамленні прыходзяць з Брэста, ад дзяцей, то сустракаюся з імі, запісваем сумесныя ролікі. А падпісчыкі з Расіі, Еўропы дасылаюць «галоўнаму байкеру Брэста» падарункі. Падзяка — ролік у TikTok: «Джэкі ў кепачцы з Масквы», «Джэкі ў куртачцы з Санкт-Пецярбурга», «Джэкі ў касцюме з матыльком з…» і г. д.
Разам з Дзмітрыем Джэкі праехаў каля 9000 км па Беларусі. Амаль кожны дзень ён «свеціцца» ў TikTok.
— Я ўжо даўно запусціў уласны акаўнт у іншай сетцы — Instagram. І хоць мяне называюць «мотаблогерам», я сябе такім не лічу. А вось у Джэкі ў TikTok колькасць падпісчыкаў у разы большая. Манетызаваць яго акаўнт пакуль не збіраюся, мне гэта не цікава. Здаецца, пры манетызацыі знікае тое, што робіцца выключна для душы, — кажа мужчына.
Аднойчы прытулку для бяздомных жывёл «Дабрата» спатрэбіўся кардон — на падсцілкі сабакам. Дзмітрый вырашыў скарыстацца сваёй старонкай у сацсетцы і звярнуўся да падпісчыкаў, паставіў прычэп каля офіса ў Брэсце. У выніку неабыякавыя набралі поўны прычэп кардону. А зімой у «Дабраце» замерзла калонка, коткі і сабакі засталіся без вады. Зноў выручыў інтэрнэт — прычэп за некалькі гадзін загрузілі двума паддонамі бутэлек з вадой.
Так папулярнасць Джэкі «акупляецца» не манетызацыяй, а зусім іншым спосабам.
Цяпер чытаюць
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў99
Каментары