Лукашэнка: У 2020 годзе супрацоўнікі ПВТ праявілі сябе не найлепшым чынам
Сёння Лукашэнка заслухаў даклад аб працы і перспектывах развіцця Парка высокіх тэхналогій (ПВТ). Таксама ён заявіў, што не мог уявіць, што ў 2020 годзе айцішнікі выступяць супраць яго.
«Скажам шчыра, успамінаючы 2020 год, той мяцеж, які быў навязаны нашаму народу… Супрацоўнікі Парка высокіх тэхналогій праявілі сябе, мякка кажучы, не з найлепшага боку. І, вядома, у грамадстве ў большасці сваёй прысутнічае нейкая насцярожанасць у гэтым дачыненні. Вось гэта я маю на ўвазе, што прыйшоў час зняць нейкія непатрэбныя нам нюансы з функцыянаваннем ПВТ», — заявіў Лукашэнка.
Па яго словах, віна ў гэтым кіраўнікоў кампаній, якія ўваходзяць у ПВТ.
«Гаспадары былі далёка за межамі Беларусі. Мы бачылі і атрымлівалі звесткі напярэдадні гэтага мяцяжу, што будуць задзейнічаныя супрацоўнікі ПВТ як рухаючая сіла. І зноў жа, прызнаюся, што ні я, ні спецслужбы не надалі гэтаму належнай увагі. Мы проста адмахнуліся ад гэтага. Я думаў, ну не можа ж быць, каб твае дзеці пачалі супраць цябе вайну. За гэта і паплаціліся. Аказваецца, што і такія дзеці могуць ваяваць супраць бацькоў, калі ім добра плацяць. Гэта значыць, нашы людзі (гэта таксама трэба адкрыта прызнаць), якія працуюць у Парку высокіх тэхналогій, атрымліваюць прыстойныя даходы ў параўнанні з сярэдняй зарплатай у Беларусі, аддалі перавагу вялікім грашам і выконвалі каманды сваіх замежных гаспадароў, часцей за ўсё заакіянскіх. Можа, я ў чымсьці памыляюся, але, напэўна, толькі ў дэталях. Мы аналізавалі сітуацыю з гэтых пазіцый і прыйшлі да такой высновы», — сказаў Лукашэнка.
Ён дадаў, што трэба рабіць зніжку на тое, што імі ўсё-ткі кіравалі:
«Паколькі гэта маладыя ў асноўным людзі, ды і кіраўніцтва ПВТ спусціўшы рукавы там працавала: не ведалі сваіх людзей і не процідзейнічалі своечасова ўсім гэтым негатыўным тэндэнцыям».
У той жа час ён выказаў меркаванне, што адмаўляцца ад працы ПВТ, не падтрымліваць яго было б няправільна.
Цяпер чытаюць
«Мы не ведалі Сяргея Ціханоўскага да сённяшняй прэс-канферэнцыі»12
Каментары