Доктар Камароўскі: Раней я ставіўся скептычна да людзей, якія выйшлі з плакацікамі, але цяпер разумею, наколькі яны мужныя
Знакаміты ўкраінскі доктар Яўген Камароўскі расказаў у эфіры канала «И грянул Грэм» пра тое, як змянілася яго стаўленне да расіян, якія не выходзяць на пратэсты супраць вайны. Ён прызнаецца, што ў нейкі момант ставіўся да ўсіх расіян аднолькава, але цяпер гэта абагульненне прайшло, бо ён многае зразумеў. Найбольш цікавыя фрагменты з выступлення Камароўскага, якія можна з поўным правам прыкласці і да беларусаў пад уладай Лукашэнкі, сабрала «Салідарнасць».
«Таксама было жаданне забыцца пра іх і паставіць плот да неба, але цяпер я ў рэалізме і ў разуменні, — кажа Яўген Камароўскі. — Ёсць шмат людзей з расійскімі пашпартамі, з якімі я маю зносіны. Таксама ў мяне было некалькі блізкіх знаёмых дактароў з Расіі, якія працавалі ў рамках доказнай медыцыны і якія ніколі ў жыцці не дазвалялі сабе лячыць людзей лухтой, выкарыстоўваючы «фуфламіцын». Дык вось усе яны ацалелі, яны ўсе не ў рашызме.
Для мяне гэта важна: логіка, здаровы сэнс, жаданне браць на сябе адказнасць, жаданне самому вырашаць, што такое добра і што такое дрэнна, а не ісці на падставе навязанай ідэі. І я бачу, што людзі, якім першапачаткова быў уласцівы здаровы сэнс, не пашкоджаныя і ацалелі».
Доктар Камароўскі кажа пра ўсведамленне таго, што многія ўкраінцы недаацэньвалі маштабы сістэмы падаўлення іншадумства ў Расіі.
«Таму што фактычна народ цяпер на кароткім ланцужку, але ў большасці з іх ствараецца адчуванне, што гэты ланцужок і ёсць свабода. І ім не трэба ісці за межы гэтага ланцужка. Ім не трэба выказваць сваё меркаванне. Ім не хочацца выбіраць, якія фільмы глядзець або чытаць кнігі. Яны гатовыя задаволіцца тым, што ім скажуць, што трэба глядзець ці чытаць. Вось і ўсё».
Саму сістэму падаўлення іншадумства і сістэму расійскай турмы Камароўскі называе не інакш, як «сістэмай катаванняў чалавека, выбудаванай у велізарных маштабах».
Ён кажа пра тое, што ва ўмовах, калі ёсць 1,5 мільёна добра аплачаных, сытых сілавікоў, якія трымаюцца за сваё месца і за якімі стаяць іх сем'і, якіх усё гэта задавальняе, любы, хто пікне, будзе неміласэрна падаўлены і знішчаны яшчэ і таму, што ўсе гэтыя 1,5 мільёна людзей, якія абараняюць рэжым, спрабуюць паказаць, што яны гэтаму рэжыму патрэбныя.
«Так што, — кажа Камароўскі, — цяпер яны будуць вельмі актыўна махаць дубінкамі, праяўляць ініцыятыву, стараннасць і шукаць ворагаў.
Таму ў тым, што я раней абураўся, што хтосьці не выходзіць, я адназначна не меў рацыі. І калі раней я ставіўся скептычна да чалавека, які выйшаў з плакацікам, то цяпер я разумею, што для таго, каб у Расіі выйсці на вуліцу з плакацікам, трэба мець проста велізарную асабістую мужнасць.
Я не разумеў, да чаго гэта можа прывесці.
А любая дзяўчынка, якая выйшла з плакацікам, усведамляе, што ўвечары яе могуць згвалтаваць у паліцэйскім участку».
Чытайце таксама:
Доктар Камароўскі: Я не да канца разумеў усіх тараканаў Лукашэнкі, але ў 2020-м усё змянілася
Камароўскі: У 2020 годзе ўвесь свет, і Украіна ў тым ліку, пакінулі Беларусь сам-насам са злом
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары
бальшыня ўкраінцаў сапраўды не разумелі і не разумеюць, як цяжка было і на жаль ёсць нам... тым больш ім цяжка ў сённяшніх варунках пабачыць за агульным вобразам ашалелага вар'ята-імперца, як цяжка было-ёсць шматпакутным народам і народнасцям, проста нармальным людзям у самой расеі-народаў турме...
мне б самой хацелася дасканала ведаць сусветную (і нашу канечне ж) гісторыю, каб зразумець, дзе корні гэтага ўсяго...
як, напрыклад, так сталася, што ў нейкі момант паўстала вось такая масковія?
інтуітыўна я адчуваю... здагадваюся... і нешта канечне ж знаю.
але мне трохі не хапае маіх абмежаваных мазгавых і не толькі) рэсурсаў, каб сабраць у адно гэта ўсё