У Барселоне па абвінавачванні ў сэксуальным гвалце арыштавалі бразільскага футбаліста Дані Алвеса. Экс-абаронца «Барселоны», самы тытулаваны футбаліст свету адхіляе абвінавачванні, піша Бі-бі-сі.
У пятніцу суд Барселоны заключыў Алвеса пад варту да канца следства без магчымасці ўнесці заклад. Суддзя палічыў, што бразілец можа схавацца.
Мексіканскі клуб, у якім цяпер грае былы гулец «Ювентуса» і «ПСЖ», ужо абвясціў аб скасаванні кантракту.
Што адбылося
39-гадовага футбаліста затрымалі ў пятніцу. У паліцыю яшчэ 2 студзеня звярнулася жанчына і абвінаваціла Алвеса ў сэксуальным гвалце. Абвінавачванне ў сэксуальным гвалце ў Іспаніі даволі шырока трактуецца — ад непажаданых заляцанняў да згвалтавання.
У паліцыі падрабязнасцяў не прывялі, але крыніца, блізкая да расследавання, паведаміла агенцтву Франс Прэс, што Алвеса абвінавачваюць менавіта ў згвалтаванні.
Як дадае крыніца, жанчына, імя якой СМІ не называюць, паўтарыла сваё абвінавачванне перад судом у пятніцу.
Паводле інфармацыі іспанскіх СМІ, меркаваны інцыдэнт адбыўся ў адным з барселонскіх начных клубаў у ноч на 31 снежня. Газета ABC піша, што Алвес нібыта падчас танца засунуў руку пад ніжнюю бялізну жанчыны без яе згоды, а затым прайшоў за ёй у туалет.
Алвес пацвярджае, што быў у клубе, але абвінавачванні ў непрыстойных паводзінах адмаўляе.
«Я танцаваў і проста добра бавіў час, нікому не перашкаджаў. Я не ведаю, хто гэтая жанчына. Як я мог такое зрабіць жанчыне?»
У акружэнні футбаліста ў абвінавачванні таксама не вераць. Яго жонка, іспанская мадэль Жаана Санз сказала, што ў той вечар Алвес пайшоў на вечарыну з сябрамі, каб развеяцца. «Ён пайшоў патанцаваць, паслухаць музыку. Ён гэта любіць. Вось і ўсё. Нічога не было. Я ведаю, што ён вельмі ветлівы і паважлівы».
Мексіканскі клуб, з якім у Алвеса быў кантракт да 30 чэрвеня 2023 года, неадкладна разарваў адносіны з футбалістам.
«Клуб пацвярджае сваю нецярпімасць да дзеянняў, якія супярэчаць духу і каштоўнасцям клуба. Мы не можам дапусціць, каб паводзіны аднаго чалавека нанеслі шкоду нашым прынцыпам», — сказаў дырэктар футбольнага клуба Леапольда Сілва.
У Барселоне Алвес праводзіў адпачынак пасля чэмпіянату свету па футболе ў Катары.
Алвес заваяваў за кар'еру 46 тытулаў і лічыцца самым тытулаваным футбалістам свету.
З іспанскім клубам «Барселона» бразільскі абаронца правёў восем сезонаў, выйграўшы з 2008 па 2016 гады шэсць разоў Ла Лігу, тройчы Лігу чэмпіёнаў і чатыры разы атрымаўшы Кубак Іспаніі.
Пасля «Барсы» Алвес выйграў з турынскім «Ювентусам» «чэмпіёнства Італіі і Кубак краіны, пасля чаго ў складзе «Пары Сен-Жэрмена» за тры гады ў клубе стаў чэмпіёнам Францыі, а таксама выйграў Кубак Лігі і Суперкубак.
У 2019 годзе Алвес быў прызнаны найлепшым гульцом Кубка Амерыкі ў складзе бразільскага «Сан-Паўлу», а ў 2020 годзе са зборнай Бразіліі стаў пераможцам Алімпійскіх гульняў 2020 года ў Токіа.
У студзені 2022 года Алвес ненадоўга вярнуўся ў «Барселону» як свабодны агент.
У 2022 годзе ў Катары Алвес стаў самым узроставым футбалістам у гісторыі чэмпіянатаў свету. Абаронца зборнай Бразіліі выйшаў на поле ва ўзросце 39 гадоў, 6 месяцаў і 27 дзён.
У складзе зборнай Бразіліі Алвес з 2006 года згуляў 126 матчаў і забіў 8 галоў.
Як мучылі Ціля Швайгера і цэнтры гарадоў, каб стварыць карцінку для судзімага за махлярства пратэжэ Дзмітрыя Баскава12
Каментары