Сёння Аляксандр Лукашэнка выступіў са шматслоўнымі заявамі, у тым ліку на адрас народа і беларусаў-эмігрантаў (Лукашэнка: Тыя, хто вяртаецца, павінны стаць яшчэ большымі ябацькамі, чым тыя, хто тут), (Вылезлі з-пад плінтуса — рэакцыя будзе жорсткая), (Лукашэнка: Зяленскі каліноўцаў у калясцы па хакейнай пляцоўцы катаць не будзе). «Наша Ніва» пераклала іх з мовы намёкаў.
Аляксандр Лукашэнка цудоўна ведае, што «няма дурных» і не спадзяецца нікога вярнуць. Наадварот, ён і не хоча, каб яго праціўнікі вярталіся. Ëн працягвае масавыя рэпрэсіі, гэта значыць, працягвае выціскаць актыўных людзей з Беларусі.
Заявы Лукашэнкі маюць іншую мэту — мінімізаваць актыўнасць людзей, у тым ліку ў эміграцыі. Яны хочуць, каб людзі маўчалі не толькі ўнутры краіны, але і за мяжой.
Будзеце маўчаць і не рыпацца цяпер — будзеце мець, не цяпер, а ў будучыні, большы шанец вырашыць нейкае пытанне ўнутры краіны ці прыехаць. А тыя, хто будзе актыўны, хто, у тэрміналогіі Лукашэнкі «працягвае дэструктыўную дзейнасць супраць нашай краіны», тыя такой магчымасці не атрымаюць: «У такім выпадку зваротнай дарогі няма і не будзе».
Лукашысты хочуць як зменшыць колькасць людзей, якія далучаюцца да беларускіх добраахвотніцкіх батальёнаў, так і колькасць тых, хто бярэ актыўны ўдзел у незалежных асяродках эміграцыі (удзельнічае ў ініцыятывах, данаціць у фонды салідарнасці і на СМІ, падтрымлівае добраахвотнікаў і гэтак далей).
Лукашэнкаўцы робяць з эміграцыяй тое, чым яны цяпер займаюцца з Украінай і Захадам,— гандлююць паветрам і абяцанкамі не абвастраць сітуацыю.
(гартайце ніжэй, каб прачытаць працяг)
«Наша Нiва» — бастыён беларушчыны
ПАДТРЫМАЦЬ«Мы не спынім падтрымкі Расіі, не спынім матэрыяльна-тэхнічнае і прапагандысцкае забеспячэнне расійскай агрэсіі. Але калі вы зменшыце падтрымку каліноўцаў і апазіцыі і ўстрымаецеся ад новых санкцый, мы не будзем узмацняць падтрымку Расіі», — гэта пасланне Украіне і Захаду.
«Калі вы будзеце сядзець і маўчаць і не будзеце падтрымліваць Ціханоўскую, Аб’яднаны пераходны кабінет і каліноўцаў, то мы не амністуем вас, бо нам вы тут не трэба, але і не зробім вам горш. А не будзеце маўчаць — тады будзем рабіць вам яшчэ горш» — вось пасланне Лукашэнкі.
Аляксандра Лукашэнку працягвае напружваць як наяўнасць у яго праціўнікаў адзінага цэнтра і адзінага лідара, так і стварэнне добраахвотніцкіх фармаванняў з досведам баявых дзеянняў. У выпадку аслаблення Расіі, яе паражэння ва Украіне, і першае, і другое можа мець для беларусаў значэнне.
Пасля даносу Бондаравай раптоўна адмянілі выставу ў музеі Янкі Купалы. Цяпер яна патрабуе на музеі шыльды па-руску29
Каментары