У Беларусі перастала працаваць сістэма анлайн-кантролю за рухам тавараў — ад шын да фенаў. Гэта не першы такі збой сёлета
Праграмны комплекс, які абавязвае бізнэс перадаваць звесткі пра кожную партыю бытавой тэхнікі, веласіпедаў і шэрагу іншай прадукцыі праз электронныя накладныя, стаў недаступны. Прычыны тэхнічнай праблемы і тэрміны аднаўлення базы, на якой таксама трымаецца дзяржаўны маніторынг цэн, пакуль не называюцца.
Недаступнасць сэрвісаў праграмнага комплексу «Сістэма прасочвання тавараў», скарочана ПК СПТ, была зафіксаваная ў нядзелю, 15 лістапада 2026 года, а 14:40. Пра гэта паведаміў афіцыйны тэлеграм-канал Міністэрства падаткаў і збораў. У ведамстве адзначылі, што пра аднаўленне працы комплексу паведамяць дадаткова, аднак ні прычын збою, ні прыблізнага часу выпраўлення сітуацыі не ўдакладнілі.
Што гэта за сістэма і за чым яна сочыць
Праграмны комплекс уваходзіць у структуру аўтаматызаванай сістэмы падатковага ведамства «Разлік падаткаў» і дзейнічае з 1 ліпеня 2021 года паводле ўказа № 496. Як тлумачыцца на сайце Міністэрства падаткаў і збораў, платформа ў рэжыме рэальнага часу кантралюе выраб, імпарт і перамяшчэнне асобных груп тавараў па Беларусі і ў межах ЕАЭС. Любая кампанія ці індывідуальны прадпрымальнік пры аперацыях з такой прадукцыяй абавязаныя выкарыстоўваць электронныя накладныя і перадаваць поўныя звесткі пра кожную партыю ў базу падатковай.
Акрамя падатковага кантролю, гэтая база служыць падмуркам для маніторынгу цэнаўтварэння. Як паведамляў Нацыянальны прававы інтэрнэт-партал са спасылкай на намесніцу міністра антыманапольнага рэгулявання і гандлю Наталлю Васілеўскую, менавіта сістэма прасочвання з’яўляецца асноўнай крыніцай даных для створанай уладамі аўтаматызаванай сістэмы аналізу і кантролю цэн. Яна дазваляе штодня адсочваць ланцужкі змены кошту тавару ад вытворцы або імпарцёра да рознічнай крамы.
Спачатку пад такі кантроль траплялі толькі тры групы тавараў: шыны і пакрышкі, халадзільнікі і маразільнікі, а таксама велатавары. Аднак з 1 сакавіка 2026 года, паводле звестак партала pnkbel.by, спіс істотна пашырылі за кошт буйной і дробнай бытавой тэхнікі. Цяпер праз сістэму праходзяць пральныя і пасудамыйныя машыны, кухонныя камбайны, мультываркі, мікрахвалевыя печы, пліты і варачныя паверхні, пыласосы, прасы, чайнікі, дрылі, фены і тэлевізары.
Як працуе бізнэс падчас такіх адключэнняў
Цяперашні збой у працы ПК СПТ — ужо другі зафіксаваны сёлета выпадак. Папярэдняе адключэнне адбылося 14 лютага 2026 года, калі сэрвісы комплексу перасталі працаваць з 08:00.
Тады Міністэрства ппадаткаў і збораў на сваім сайце тлумачыла, што на час тэхнічных непаладак бізнэс мае права адгружаць падкантрольныя тавары са звычайнымі папяровымі накладнымі.
Аднак ад лічбавай справаздачнасці гэта не вызваляе: пасля аднаўлення работы сістэмы прадпрымальнікі ўсё роўна абавязаныя стварыць электронныя накладныя і загрузіць іх у базу на працягу пяці працоўных дзён. У паведамленні ад 15 лістапада ведамства пакуль не інфармавала пра вяртанне сэрвісаў да працы.
Каментары