«У будучыні тут вырасце міжнародны горад-спадарожнік». Кіраўнік «Вялікага каменя» расказаў пра перспектывы, якія заходзяць далёка за гарызонт
Індустрыяльны парк «Вялікі камень» у Смалявіцкім раёне — самы вялікі праект Кітая ў Беларусі. Як ён развіваецца і колькі зарабляюць супрацоўнікі, расказаў у эфіры СТБ кіраўнік адміністрацыі парка Аляксандр Ярашэнка.
Паводле Ярашэнкі, кітайскія выдаткі на стварэнне гэтага індустрыяльнага парка пакуль не акупіліся: усяго Кітай уклаў больш за 800 мільёнаў даляраў. Але вось беларускі ўнёсак нібыта ўжо даў плён: выдаткавалі больш за 37,5 мільёна даляраў з бюджэту, а вярнулі ўжо 60 мільёнаў.
З 12 000 гектараў тэрыторыі парка ўжо засвоілі 855.
Больш за 85% супрацоўнікаў парка на сённяшні дзень — беларусы. Заробкі ў іх, паводле Ярашэнкі, «даволі высокія», у сярэднім 3 тысячы рублёў.
Экспарт і колькасць работнікаў у «Вялікім камені» плануюць нарошчваць: хочуць мець больш за 350 мільёнаў даляраў экспарту і не менш за 5 тысяч супрацоўнікаў.
Рэзідэнты парка, паводле Ярашэнкі, пастаўляюць сваю прадукцыю ў 20 краін свету, агульны іх экспартны складнік у мінулым годзе павінен быў перавысіць 100 мільёнаў даляраў. Не так шмат, бо гэта толькі пачатак шляху.
Асноўная праца — «на нашым Еўразійскім кантыненце», але «ёсць пастаўкі і ў іншыя краіны свету: ЗША, Германія, Еўропа і гэтак далей».
За мінулы год парку ўдалося прыцягнуць 19 новых рэзідэнтаў (усяго іх цяпер 102), у гэтым годзе планавы ўзровень прагназуецца вышэйшы — на 20.
Увогуле ж Аляксандр Ярашэнка аптымістычна дадае:
«Калі ахапіць перспектывы «Вялікага каменя», то яны заходзяць далёка за гарызонт. У будучыні тут вырасце міжнародны горад-спадарожнік. Высокатэхналагічны, сучасны, абавязкова з прыстаўкай «эка».
Каментары