Латвія павялічыць выдаткі на абарону: краіна закупіць устаноўкі HIMARS і марскія ракеты

Мурніеце заявіла на пасяджэнні парламенцкага Камітэта па абароне, унутраных справах і прадухіленні карупцыі, што ў яе міністэрстве рэалізуюцца тры праграмы, якія трэба паскорыць для ўмацавання абараназдольнасці Латвіі. «Да іх адносяцца берагавая абарона ад караблёў праціўніка, артылерыйскія сістэмы і сістэмы СПА сярэдняй далёкасці», — цытуе словы чыноўніцы мясцовае інфармацыйнае агенцтва LETA.

«Чакаецца, што мы дасягнём [расходаў на абарону] 3% ВУП да 2027 года, але з гэтымі праектамі, якія хутка развіваюцца, я думаю, мы дасягнём 3% ВУП раней за 2027 год», — сказала Мурніеце.

Тры прыбалтыйскія дзяржавы паскорылі свае праграмы набыцця ракет і артылерыі ў адказ на навуку, атрыманую з расійскага ўварвання ва Украіну. Калі Латвія замовіць зброю HIMARS, яна стане трэцяй балтыйскай краінай, якая будзе выкарыстоўваць мабільныя ракетныя ўстаноўкі вялікай далёкасці. Летась у снежні Эстонія падпісала пагадненне са Злучанымі Штатамі аб закупцы шасці адзінак такой зброі, а ў тым жа месяцы Літва і ўрад ЗША падпісалі кантракт на цэлых васьмі адзінак.

Разам тры краіны Балтыі будуць мець 20 адзінак «Хаймарсаў». Украіна мае каля 50 адзінак, гэтага хапіла, каб змяніць сітуацыю на фронце.

Naval Strike Missile — гэта супрацькарабельныя ракета, распрацаваная амерыканскай кампаніяй Raytheon і нарвежскай Kongsberg, якая ляціць над паверхняй мора.

У 2023 годзе Рыга плануе выдаткаваць прыкладна мільярд даляраў на свой абаронны бюджэт, ці каля 2,25% ВУП Латвіі. Гэта больш, чым у мінулыя гады выдзяляла Беларусь, у якой прыярытэтам было фінансаванне спецслужбаў і спецназа, а не войска.

Адначасова Латвія прасоўвае праект па аднаўленні абавязковай воінскай павіннасці пасля спынення прызыву ў 2007 годзе, і адпаведны законапраект чакае галасавання ў парламенце. Сёлета нацыянальныя Узброеныя сілы Латвіі набяруць першую групу добраахвотнікаў, а ў 2027 годзе ўсе грамадзяне мужчынскага полу ад 18 да 27 гадоў павінны будуць выбраць адну з даступных форм вайсковай службы.

«Грамадзянін Латвіі павінен будзе адслужыць адзін год, у які таксама ўваходзіць месяц адпачынку. Навабранцы пройдуць трохмесячную базавую падрыхтоўку і трохмесячны курс спецыялізацыі, а астатнія пяць месяцаў будуць прысвечаны інтэграцыі ў падраздзяленні і калектыўнай падрыхтоўцы», — гаворыцца ў заяве Мінабароны.

Урад краіны ставіць за мэту ў 2027 годзе «давесці долю баяздольнага насельніцтва Латвіі… да 50 000 чалавек». З іх 14 тысяч вайскоўцаў будуць у часцях дзеючай службы, 16 тысяч — у Нацыянальнай гвардыі і 20 тысяч — у рэзерве, паведамляе міністэрства.

• 11
• 0
• 0
• 1
• 0
• 0