Дэмакратычны лідар Беларусі выступіла са зваротам да Дня Канстытуцыі, які адзначаецца сёння на афіцыйным узроўні. Канстытуцыя Беларусі, нагадаем, была прынятая 15 сакавіка 1994 года.
«Сёння Дзень Канстытуцыі. Канстытуцыі, якую за апошнія 28 гадоў некалькі разоў незаконна перапісвалі. Канстытуцыі, артыкулы якой сістэматычна парушаў рэжым, акрамя хіба што артыкула 20 «Мінск — сталіца Беларусі». Канстытуцыі, якая ўжо даўно страціла свой сэнс», — адзначыла Святлана Ціханоўская.
«На жаль, сёння не той дзень, з якім можна павіншаваць, але той, калі можна нагадаць сабе, як шмат мы з вамі ўжо зрабілі на шляху да вяртання сваіх канстытуцыйных правоў. І як шмат нам яшчэ давядзецца зрабіць, каб усе законы нашай краіны працавалі і абаранялі беларусаў, а не станавіліся інструментам для рэпрэсій супраць народа».
Па словах Святланы Ціханоўскай, у дэмакратычных сілаў ужо ёсць бачанне таго, як павінна выглядаць Канстытуцыя новай Беларусі.
«Нашая задача — не проста новая кніжка з наборам слоў, якой кожны чыноўнік зможа грэбаваць дзеля ўласных інтарэсаў. Нашая задача — вярнуць гэтаму дакументу значнасць. Падрыхтаваць такую Канстытуцыю, якая стане абаронай ад дыктатуры, гарантуе кожнаму чалавеку правы і свабоды, а таксама ўсталюе дэмакратычныя стрымліванні і процівагу», — зазначыла дэмакратычная лідарка.
Ціханоўская прапануе кожнаму далучыцца да абмеркавання праекта Канстытуцыі новай Беларусі на сайце: kanstytucyja.online.
«Я ведаю, што дэмакратычныя перамены ў нашай краіне непазбежныя, як бы моцна рэжым не спрабаваў пераканаць нас у адваротным. Непасрэдна цяпер мы з вамі набліжаем той час, калі Беларусь стане свабоднай дэмакратычнай краінай», — рэзюмуе Святлана Ціханоўская.
Каментары