Вялізная хваля затрыманняў — стала зразумела, на каго гэтым разам палявалі КДБ і ГУБАЗіК

3 1 кастрычніка супрацоўнікі КДБ пачалі свае візіты да людзей у розных рэгіёнах у рамках крымінальнай справы, заведзенай паводле артыкула 357 КК (змова ці іншыя дзеянні, учыненыя з мэтай захопу дзяржаўнай улады).

Праваабаронцы паведамілі, што адных затрыманых пакінулі за кратамі, іншыя ж выйшлі на волю ў статусе сведкаў па крымінальнай справе.

На прыцэле — дваравыя чаты і актывісты розных аб'яднанняў

Імаверна, найбольшая частка затрыманняў звязаная з тым, што КДБ прызнаў экстрэмісцкім фармаваннем кааліцыю дваровых чатаў «Ордэн». Рашэнне пра гэта было прынята 29 кастрычніка, а вядома пра яго стала цяпер. 

Прадстаўнік адной з каманд, якая дапамагала актывістам у Беларусі, прызнаў, што затрымалі дзясяткі іх людзей.

На яго думку, масавыя затрыманні сталі вынікам папярэдняга маштабнага расследавання КДБ, якое пачалося яшчэ ў канцы 2021-га — 2022 годзе.

«Тады кадэбэшнікі пасля затрыманняў пачалі атрымліваць першую інфармацыю пра розныя мерапрыемствы і само існаванне пэўных аб'яднанняў. Яны пачалі вывучаць іх і, так сказаць, усё больш падрабязна вывучаць гэтую інфармацыю, захопліваць і дапытваць новых людзей. Такім чынам яны склалі пэўную карціну і цяпер зрабілі тое, што зрабілі».

Суразмоўца дапускае, што спецслужбы змаглі ідэнтыфікаваць асобных людзей, бо ў іх у руках апынулася інфармацыя, атрыманая пры нечым затрыманні. «Але ў ніводнага з затрыманых не было поўнай карціны», — сцвярджае ён.

Дакумент КДБ вызначае новае «экстрэмісцкае фармаванне» як «групу грамадзян з ліку прадстаўнікоў дваровых суполак (фармаванняў/кааліцый) «Ордэн» пад назвамі «Злыя кіпцікі», «Сухарава», «Сеніца 2.0», «Салідарнасць», «Вольныя ваўкі», «Навагрудскія партызаны», «Вілія», «Сціплыя матрошкі», а таксама арганізацыю «Суседзі».

У дакуменце згадваюцца імёны Ірыны Якаўлевай, Наталлі Даронінай, Дыяны Гаўрылавай, кіраўніка арганізацыі «Суседзі» грамадзяніна Украіны Івана Амеляна. Таксама ў дакумент унесеныя Вольга Няхайчык, Кастусь Кірыленка, Лізавета Плітнік, Наталля Гужова, Ірына Смалярова, Станіслаў Ботвін, Наталля Лантух — іх КДБ называе «куратарамі», а ў дужках «ментарамі».

Інфармацыю, што супрацоўнікі КДБ падчас рэйдаў 31 кастрычніка — 1 лістапада цікавіліся ў тым ліку дваровымі чатамі, пацвярджаюць і правааабаронцы.

ГУБАЗіК адначасова адпрацоўваў прадпрыемствы

Падобна, што ў той жа час ГУБАЗіК «адпрацаваў» некалькі прадпрыемстваў і раёнаў у рэгіёнах. Ён дзейнічаў па ўласным плане, паралельна.

ГУБАЗіК пераважна прыходзіў да людзей, якія траплялі пад увагу сілавікоў раней. Гэта адпавядае логіцы аперацыі па перадвыбарчым застрашванні насельніцтва, пра якую «Наша Ніва» паведамляла раней.

Аблаву 31 кастрычніка — 1 лістапада па маштабе можна параўнаць з арыштамі сваякоў палітвязняў і людзей, якія ім дапамагалі, зімой 2024-га.

Вядома, што ізалятары часовага ўтрымання ў рэгіёнах і Акрэсціна ў Мінску перапоўненыя. 

«Нахапалі кучу народу. У двух– і трохмесных камерах — па 15-20 чалавек», — расказвае чалавек, які вызваліўся нядаўна.

Калі вы ведаеце пра тое, што здарылася, больш, пішыце рэдактару «Нашай Нівы» ў ТГ ці на [email protected]. Або любому рэдактару ці журналісту «Нашай Нівы», якога ведаеце асабіста. Важна каб свет ведаў пра тое, што вырабляюць з беларусамі.

• 0
• 2
• 0
• 0
• 1
• 2
• 33
• 0