Праз некалькі дзён пасля пачатку мабілізацыі з Расіі на чартары паляцелі 250 дактароў. Яго аплаціў мільярдэр са спісу Forbes
У верасні 2022 года праз некалькі дзён пасля пачатку мабілізацыі Расію на чартарным рэйсе пакінулі адразу 250 дактароў, якія асцерагаліся адпраўкі ва Узброеныя сілы.
Паводле звестак журналістаў, рэйс арганізаваў «знакаміты доктар». Лекары, якія ляцелі на самалёце, заплацілі за гэтую магчымасць па 40 тысяч расійскіх рублёў (больш за 500 даляраў), а астатнія неабходныя для выкупу чартару грошы дадаў нейкі расійскі мільярдэр са спісу Forbes, які інвестуе ў сферу лічбавых тэхналогій. Імёны арганізатара рэйса і бізнэсмена не раскрываецца па меркаваннях бяспекі.
У якасці прычыны для вылету за мяжу арганізатары рэйса прыдумалі легенду пра медычны кангрэс у Ерэване. Усім пасажырам раздалі надрукаваныя запрашэнні на неіснуючы Кангрэс, а таксама нататнікі і ручкі з яго лагатыпам.
За дзень да вылету высветлілася, што перагружаны самалётамі з Расіі аэрапорт Ерэвана больш не прымае чартарныя рэйсы. Тады арганізатары вырашылі ляцець у Казахстан — ім давялося перадрукаваць запрашэнні і атрыбутыку. Борт паляцеў у Астану 27 верасня.
Пасля абвяшчэння аб мабілізацыі Расію, паводле розных ацэнак, пакінулі ад некалькіх сотняў тысяч да больш чым мільёна чалавек. Часцей за ўсё яны з'язджалі ў Казахстан, Грузію, Арменію і Турцыю.
Цяпер чытаюць
«У майго 21 сантыметр — дзесяць базавых далі». Беларусы ў тыктоку жартуюць з новых правілаў ад чыноўнікаў4
Каментары