Кампанія-ўладальнік TikTok грае ключавую ролю ў вайскова-прамысловай сферы Кітая — справаздача
Згодна з новай справаздачай спецыяльнай парламенцкай камісіі Аўстраліі, кампанія ByteDance таксама мае ўскоснае дачыненне да распрацоўкі ядзернай зброі, выпрабаванняў гіпергукавых ракет і генацыду уйгураў у Кітаі.
Кітайская кампанія ByteDance, якой належыць мабільная платформа TikTok, мае ключавое значэнне для палітыкі Камуністычнай партыі Кітая ў ваенна-прамысловым і выведвальным сектарах краіны. Пра гэта 20 сакавіка напісаў часопіс National Review са спасылкай на нядаўнюю справаздачу спецыяльнай парламенцкай камісіі Аўстраліі.
Асноўнай мэтай камісіі было выяўленне фактаў умяшання кітайскіх праўладных кампаній у выбары ў Аўстраліі. Расследаванне паказала, што кампанія ByteDance знаходзіцца пад фактычным кантролем уладаў Кітая. У якасці доказаў і аргументаў у дакуменце прыводзяцца наступныя звесткі:
- Кіраўніцтва кампаніі непублічна ўваходзіць у КПК і мае непасрэднае дачыненне да ваеннага крыла гэтай палітычнай партыі.
- Кампанія адкрыта супрацоўнічае з Міністэрствам грамадскай бяспекі Кітая ў «афлайн-дзейнасці», што выліваецца ў масавае сачэнне і арышты кітайскіх грамадзян у краіне праз кітайскую версію праграмы TikTok.
- Некаторыя ключавыя супрацоўнікі кампаніі ByteDance з'яўляюцца актывістамі «Адзінага фронту» — кітайскага палітычнага аб'яднання, якое кантралюецца КПК і аб'ядноўвае галоўныя «грамадскія» арганізацыі краіны (прафсаюзы, маладзёжныя аб'яднанні, жаночыя саюзы і іншае).
- ByteDance дапамагае чатыром буйным кітайскім універсітэтам (у іх ліку Пекінская акадэмія штучнага інтэлекту) ствараць ваенныя тэхналогіі для патрэб арміі Кітая.
«Апроч гэтага, кампанія ByteDance мае цеснае партнёрства з пяццю кітайскімі фірмамі —распрацоўшчыкамі сістэм сачэння (iFlyTek, SenceTime і інш.), якія ўнесеныя ў чорны спіс ЗША за ўдзел у масавых рэпрэсіях і генацыдзе ў дачыненні да уйгураў.
Яшчэ адным важным партнёрам ByteDance з'яўляецца буйны тэхналагічны гігант Sugon, які займаецца сімуляцыйнымі выпрабаваннямі ядзернай зброі і гіпергукавых ракет», — гаворыцца ў справаздачы спецыяльнай парламенцкай камісіі Аўстраліі.
Аўтары расследавання прыходзяць да высновы, што «адсутнасць палітычнай рэакцыі можа зрабіць TikTok наступным сур'ёзным выклікам устойлівасці дэмакратычнага свету з боку аўтарытарных краін».
Сам ByteDance ўжо адрэагаваў на справаздачу, заявіўшы, што ў аўтараў расследавання адсутнічае разуменне карпаратыўнай структуры кампаніі.
«Крыніцы гэтай справаздачы спасылаюцца толькі на адну з даччыных кампаній BiteDance, якая дзейнічае выключна ў Кітаі і не мае аперацыйнага кантролю над TikTok. Гэтая няправільная характарыстыка нашай кампаніі — толькі адна з многіх недакладнасцяў, якія аспрэчваюць давер да справаздачы», — заявіла прэс-сакратарка ByteDance Джэніфер Бэнкс.
ЗША і ЕС, а таксама шэраг заходніх краін паступова абмяжоўваюць выкарыстанне TikTok з меркаванняў бяспекі. Напрыклад, у ЗША ў гэты момант хочуць цалкам забараніць гэтую сацсетку, нягледзячы на яе масавую папулярнасць.
Сутнасць пытання і рызыкі выкарыстання TikTok мы раней таксама падрабязна апісвалі тут.
Сі Цзіньпін на сустрэчы з Пуціным у Маскве можа абмеркаваць магчымыя схемы па абыходзе заходніх санкцый
«Гэта траянскі конь». Кітай можа шпіёніць з дапамогай партовых кранаў — крыніцы ў Пентагоне
ЗША абмяркоўваюць з саюзнікамі магчымыя санкцый супраць Кітая, калі ён акажа дапамогу Расіі ў вайне з Украінай
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць22
Каментары