Апыталі афіцэраў пра размяшчэнне ядзернай зброі ў Беларусі. Вось якая іх ацэнка сітуацыі
«Наша Ніва» папрасіла дзейных афіцэраў беларускай арміі пракаментаваць планы Расіі размясціць у Беларусі тактычную ядзерную зброю.
«Я ўспрымаю гэта як адказ Пуціна на ўступленне Фінляндыі ў НАТА. Па правілах, яму трэба нечым адказваць. А адказваць няма чым — вайна паказала слабасць расійскай арміі, войскі задзейнічаныя на фронце. Перасунуць у адказ ядзерную зброю трошкі на захад — адзіная, фактычна, опцыя, якая Пуціну дасяжная цяпер», — сказаў нам афіцэр беларускага войска.
«Я думаю, будзе расійская пастаянная вайсковая база з ядзернай зброяй на тэрыторыі Беларусі. Персанал там будзе расійскі. У тое, што Лукашэнку Пуцін даверыць хаця б кавалачак боегалоўкі, — я не веру, — сказаў другі афіцэр. — Развагі пра тое, што Лукашэнка будзе на нешта ўплываць, успрымаю як казкі.
Рускія яго спачатку купілі на тое, што беларускіх пілотаў падрыхтуюць для выкарыстання ядзерных ракет, але што далей? Падрыхтавалі і падрыхтавалі, трымайце значок.
Лукашэнку хочацца быць вялікім палітыкам, уплываць на лёсы планеты. Цяпер яго купляюць на магчымасць стаць заўважным».
«Сам я катэгарычна супраць размяшчэння ядзернай зброі. Гэта робіць нас закладнікамі чужой волі і дае рускім падставу для ўмяшання ў любы момант — тыпу, каб выключыць пагрозы для атамнай зброі», — дадае ён.
«Ці хацеў бы Лукашэнка ядзерную зброю? На нашым узроўні мы не ведаем. Ён шкадуе, што яе няма. На выпадак, калі «плечы» Пуціна знікнуць і ён застанецца адзін у варожым свеце. Але наколькі я бачу сітуацыю, Пуцін яму бомбы не дасць. Хутчэй паверу ў тое, што мы самі скляпаем бомбу ў Соснах і Астраўцы з дапамогай Ірана», — кажа трэці афіцэр.
Цяпер чытаюць
Каб не плаціць падатак на сабак, мінчукі пачалі здаваць іх у пункты адлову12
Каментары