«Гэта маё штодзённае адзенне». Жыхару Фаніпаля далі «хатнюю хімію» за ўдзел у пратэстах
Суд Дзяржынскага раёна 2 мая вынес прысуд 37-гадоваму жыхару Фаніпаля Максіму Палуянчыку, абвінаваціўшы яго ў арганізацыі і падрыхтоўцы дзеянняў, якія груба парушаюць грамадскі парадак, альбо ўдзеле ў іх, паводле ч. 1 арт. 342 Крымінальнага кодэкса, паведаміла «Вясна».
Паводле абвінавачання, Максім Палуянчык 14 жніўня 2020 года браў актыўны ўдзел у несанкцыянаваным масавым мерапрыемстве па вуліцы Брэсцкай у Фаніпалі. Пры гэтым ён нібыта разам з іншымі выходзіў на праезную частку вуліцы, замінаў працы грамадскага транспарту, пляскаў у далоні і не падпарадкоўваўся патрабаванням супрацоўнікаў міліцыі. А галоўнае — быў апрануты ў белую цішотку і чырвоную байку.
«Чаму вы так апрануліся?» — цікавіўся на судзе прадстаўнік абвінавачання.
«Таму што гэта маё штодзённае адзенне», — адказаў абвінавачаны.
Палуянчыка затрымалі на месцы працы 24 студзеня 2023 года і да суда змясцілі пад варту.
Суд прызнаў Максіма вінаватым і прызначыў яму пакаранне ў выглядзе абмежавання волі без накіравання ва ўстанову адкрытага тыпу тэрмінам на два гады і шэсць месяцаў.
Яго вызвалілі з-пад варты ў зале суда.
Справу разглядаў суддзя Сяргей Крупец.
Цяпер чытаюць
Як рыхтаваўся візіт Ціханоўскай у Кіеў і чаму ён некалькі разоў пераносіўся7
Каментары