«Выдатны кіраўнік і лідар». Звольненая працаўніца МНПЗ запісала новае відэа, у якім хваліць Дворніка
Жанчына, якую затрымалі і звольнілі за крытыку дырэктара «Мазырсолі», запісала відэа з пахваламі кіраўніка прадпрыемства, піша «Флагшток».
Ірына Антоненка працавала на Мазырскім НПЗ прыбіральшчыцай. У канцы красавіка з'явілася інфармацыя аб тым, што некаторым работнікам завода ААТ «Мазырсоль», у тым ліку і яе мужу Генадзю, не будзе працягнуты кантракт. Напярэдадні дырэктар завода Уладзімір Дворнік звольніў адразу некалькіх работнікаў — ім не працягнулі кантракты, паводле «Флагштока», нібыта з-за частых выхадаў на бальнічны.
1 мая Ірына запісала відэа, дзе расказала пра звальненні на заводзе і раскрытыкавала дырэктара завода Уладзіміра Дворніка.
1 мая відэа з'явілася ў тыктоку.
11 мая на МНПЗ сілавікі затрымалі Ірыну. Відэа знікла з яе старонкі, жанчына была звольненая.
16 мая на старонцы Ірыны з'явілася відэа, дзе яна просіць прабачэння ў кіраўніцтва ААТ «Мазырсоль» і яго дырэктара Уладзіміра Дворніка.
«Выдатны кіраўнік. Прабачце мне, Уладзімір Андрэевіч… Людзі вас паважаюць, шануюць. Вы ў іх вачах добры кіраўнік, лідар», — гаворыць яна.
Далей жанчына тлумачыць, што хацела ўратаваць свайго мужа. Таксама Ірына кажа, што хадзіла на выбары ў 2020 годзе і любіць Беларусь.
Блогер Андрэй Павук датэлефанаваўся ў Мазырскі РАУС і задаў пытанне: ці можна крытыкаваць Уладзіміра Дворніка? Начальнік аддзела унутраных спраў Мазырскага райвыканкама Андрэй Малахаў адказаў у грубай форме, што простым грамадзянам гэтага рабіць нельга.
Уладзімір Дворнік з 2010 да 2019 года быў старшынёй Гомельскага аблвыканкама.
Былыя калегі, піша «Флагшток», запомнілі яго як грубага кіраўніка. За час кіравання ў вобласці Дворнік прасунуў шэраг дарагіх і неадназначных горадабудаўнічых праектаў. Вядома, што менавіта гэты чыноўнік ініцыяваў будаўніцтва скандальнага флагштока ў Гомелі. Самай недарэчнай ініцыятывай Дворніка, якая праславіла яго за межамі Беларусі, стала будаўніцтва прыбіральні ў Гомелі «за мільён долараў».
Пасля шэрагу горадабудаўнічых скандалаў у Гомелі і масавых выступленняў гараджан супраць экалагічна шкодных праектаў Лукашэнка замяніў Дворніка на больш мяккага кіраўніка — Генадзя Салаўя.
Пры гэтым Дворнік замест паніжэння атрымаў выгадную пасаду на прыбытковым прадпрыемстве Мазыра.
Каментары