Пад Астраўцом у аварыі загінуў выпускнік беларускамоўнай віленскай гімназіі
12 чэрвеня ў Астравецкім раёне загінуў 32-гадовы матацыкліст. У міліцэйскіх зводках мужчыну назвалі літоўцам, але, як даведалася «Наша Ніва», ахвярай трагедыі насамрэч быў беларус.
Імя загінулага — Арцём Камінскі. Ён меў літоўскае грамадзянства, але карані ў мужчыны — беларускія. Бацькі Арцёма, беларусы, перабраліся ў Вільню шмат гадоў таму, і цяпер з радзімай іх звязвае хіба што старая дзядоўская хата ў Астравецкім раёне.
12 чэрвеня Арцём з роднымі якраз і наведвалі гэтую хату, каб упарадкаваць тэрыторыю ля яе. Трагедыя здарылася, калі сям’я ўжо скіроўвалася дахаты: Арцём ехаў на матацыкле Suzuki, яго сваякі — на машыне. Паводле зводак, мужчына рухаўся па трасе Р52 Гоза — Астравец — Ашмяны, на 15-м кіламетры трасы Камінскі пачаў абганяць на скрыжаванні. У гэты момант 35-гадовы кіроўца аўтамабіля Mazda, які рухаўся ў тым жа кірунку, стаў паварочваць налева і сутыкнуўся з матацыклам Камінскага. Арцём загінуў на месцы, кіроўца машыны не пацярпеў.
Знаёмыя Камінскага апісваюць яго як дужа асцярожнага чалавека, таму дакладна не зразумела, што здарылася на той трасе. Кіроўцу Mazda, грамадзяніна РФ, прызналі невінаватым у здарэнні.
Арцём скончыў Віленскую беларускую гімназію імя Францішка Скарыны, адвучыўся ў медыцынскім універсітэце ў Мінску і працаваў стаматолагам у Вільні. Знаёмыя згадваюць яго як пазітыўнага чалавека, актывіста ў школьныя часы. Тады ж, падчас навучання, Арцём сустрэў сваю жонку, таксама беларуску і навучэнку Віленскай беларускай гімназіі — яна была яго аднакласніцай.
З Камінскім развітваюцца ў Вільні 15 чэрвеня. Акрамя жонкі, у мужчыны таксама засталася двухгадовая дачка, якую ён пахрысціў два тыдні таму.
«Наша Нiва» — бастыён беларушчыны
ПАДТРЫМАЦЬУ Валожыне казуля выбіла акно кінатэатра
На нарадзе ў Лукашэнкі публічна пасварыліся чыноўнікі. Ён не ведаў, каго падтрымаць15
Каментары