Работнікі кінатэатра «Юнацтва» ў Валожыне былі вельмі здзіўленыя, калі раніцай прыйшлі на змену і заўважылі велізарныя расколіны на акне ля галоўнага ўваходу.
Як сказала Kraj.by інжынер кінатэатра Соф'я Адамаўна, першапачаткова ў супрацоўнікаў узнікла думка, што акно маглі разбіць дзеці ці хуліганы альбо яго пашкодзілі ў бойцы.
— Трэба было тэрмінова знайсці вінаватых. Выклікалі міліцыю, пачалі разбірацца. Прагледзелі камеры відэаназірання і былі ў шоку: чакалі ўсякае, але не таго, што ўбачылі, — падзялілася жанчына.
Камера зафіксавала момант, як у 7:28 раніцы ў акно кінатэатра на вялікай хуткасці бяжыць казуля. Далей жывёла ўдараецца ў шыбу, адлятае ад яе, падае, але хутка ўстае і ўцякае.
— Магчыма, яна прыняла адлюстраванне ў шкле за водную роўнядзь возера, таму і скіравалася туды, — дадае Соф'я Адамаўна.
Ганна якраз ішла на працу, калі заўважыла казулю, якая бяжыць па плошчы Свабоды:
— Сказаць, што я здзівілася — гэта нічога не сказаць. Адкуль дзікая жывёла ў самым цэнтры горада? Да найбліжэйшага лесу ж няблізка. Яшчэ больш я была здзіўленая, калі зразумела, што жывёла перабегла дарогу і кінулася ў акно. Пашанцавала яшчэ, што не трапіла пад колы якога-небудзь аўтамабіля і нікога не збіла з ног.
Як казуля апынулася ў самым ажыўленым месцы горада —невядома, як і яе далейшы лёс. Застаецца спадзявацца, што жывёла не атрымала сур'ёзных пашкоджанняў і шчасліва вярнулася ў свае звыклыя, не гарадскія, месцы пражывання
Цяпер чытаюць
Былога беларускага палітвязня судзяць у Літве за падрыхтоўку да забойству расійскага апазіцыянера. Пагражае аж да пажыццёвага6
Каментары