27 ліпеня пачнецца суд над былым спартыўным дырэктарам салігорскага «Шахцёра»
Папярэдняе следства па рэзананснай справе аб дамоўных матчах у беларускім футболе скончана, справу перадалі ў суд. Адзіным абвінавачваным па гэтай справе застаўся былы спартыўны дырэктар салігорскага клуба «Шахцёр» Уладзімір Нідэргаус.
Уладзімір Нідэргаус абвінавачваецца па ч. 1 і ч. 2 арт. 253 КК Беларусі («Подкуп удзельнікаў і арганізатараў спартыўных спаборніцтваў або відовішчных камерцыйных конкурсаў»), па якіх можна атрымаць як штраф, так і да чатырох гадоў пазбаўлення волі.
Пасяджэнні будуць праходзіць у судзе Маскоўскага раёна Мінска.
Уладзімір Нідэргаус — казахстанскі і расійскі футбаліст, нападаючы нямецкага паходжання. У мінулым вядомы па выступленнях за футбольны клуб «Ротар» (Валгаград), у якім на працягу пяці гадоў быў найлепшым бамбардзірам і лідарам каманды. У 1990-я гады ён нават згуляў адзін матч за зборную Расіі і чатыры — за зборную Казахстана, адкуль ён родам.
Пасля завяршэння прафесійнай гульнявой кар'еры ў 2000 годзе жыў у Германіі, таксама працаваў у Расіі і Казахстане. З 2021 года па студзень 2023 года быў спартыўным дырэктарам салігорскага «Шахцёра».
Каментары