Улады параілі людзям апранацца цяплей, бо халодны фронт накрыў большую частку краіны і застанецца тут як мінімум на тыдзень.
Прачнуўшыся раніцай 10 ліпеня, жыхары Іаганесбурга, найбуйнейшага горада Паўднёвай Афрыкі, убачылі за вокнамі снег. Ліпень у Паўднёвым паўшар'і — зімовы месяц, але снег тут не выпадаў вось ужо 10 гадоў, піша Бі-бі-сі.
Улады параілі паўднёваафрыканцам апранацца цяплей, бо халодны фронт накрыў большую частку краіны і застанецца тут як мінімум на тыдзень.
«Пакуль што снегапад не выклікаў сур'ёзных праблем», —паведаміў прадстаўнік Паўднёваафрыканскай метэаралагічнай службы.
Жыхары Іаганесбурга зачараваныя заснежанымі вуліцамі — рэдкім відовішчам у іх шыротах.
«Некаторыя вучні і я разам з імі пайшлі знаёміцца са снегам бліжэй … сёй-той ужо ведае, што такое снег, а іншыя думалі, што гэта проста такі дождж», — распавяла настаўніца пачатковых класаў Агнес Мідзева.
Хатняя работніца Набухосі Стомпі сказала, што ехала на працу па заснежанай дарозе і яшчэ ніколі такога не бачыла.
«У нас у дамах цёпла, так што ўсё ў парадку, — адзначыў наглядчык Білі Нксумала. — Снег ляжаў паўсюль, ён накрыў палі побач з нашым раёнам — гэта было сапраўды прыгожа».
Снег выпаў у цэлым шэрагу правінцый Паўднёвай Афрыкі, уключаючы Усходні Кейп, Мпумалангу і рэгіён Гаўтэнг, у які ўваходзяць Іаганесбург і Соўэта.
Метэаролагі параілі фермерам знайсці прыдатныя цёплыя памяшканні для жывёлы, асабліва ў халоднае надвор'е.
Пакуль нельга сказаць, ці з'яўляецца незвычайна халоднае надвор'е і снег вынікам кліматычных змен.
Каментары