«Як можа дзіця, у якога бацькі ходзяць у храм, быць піянерам?!» Протаіерэй Лемяшонак выказаўся пра саюзы моладзі і айцішнікаў
У пратаіерэя Андрэя Лемяшонка спыталі, ці можна праваслаўнаму хлопчыку стаць піянерам. Той назваў БРПА атэістычнай арганізацыяй, а пасля падзякаваў Сталіну за тысячы пакутнікаў і сказаў, што няма бяды ў тым, што айцішнікі з'язджаюць. «Культура чысціцца».
Кожны аўторак Свята-Елісавецінскі манастыр, які дапамагае расійскай арміі, запісвае для свайго YouTube-канала «Гутаркі з бацюшкам» — хто заўгодна можа задаць пытанне протаіерэю Андрэю Лемяшонку, вядомаму сваёй праўладнай пазіцыяй.
І вось якое пытанне даслалі яму ў гэты раз: «Сын пайшоў сёлета ў патрыятычны клас. Там раздаюць заявы на ўступленне ў піянеры. Сын хрышчоны, прычашчаецца, ходзіць у нядзельную школу. Ці можна яму ўступаць у піянеры?»
Пратаіерэй толькі рукамі развёў.
«Піянеры — я так разумею, гэта Саюз моладзі… Раней ленінскі саюз моладзі быў, атэістычны. Цяпер, канешне, спрабуюць неяк… Ведаеце, пакуль няма ідэалогіі… Вось цяпер у нас няма ідэалогіі, у Расіі яшчэ пакуль… Ну дзякуй Богу, там ужо крыху па-іншаму. І вось мы спрабуем нешта склеіць, нешта злучыць… Трэба казаць, што і сярод камуністаў былі розныя людзі.
Калі гэта атэістычная арганізацыя (маецца на ўвазе Беларуская рэспубліканская піянерская арганізацыя. — НН), то як можа дзіця, у якога бацькі ходзяць у храм, вернікі, быць піянерам?! Патрыятызм — гэта добра, але на чым ён грунтуецца? Мы засноўваем свой патрыятызм на веры нашай».
Здаецца, што пытанне пра піянераў раззлавала Андрэя Лемяшонка. Але з залы яму задалі яшчэ адно:
«А чаму Бог добраславіў тое, што ў 30-я гады пакутавалі людзі, разбуралі храмы, крыжы і іконы валяліся на зямлі?»
«З-за няверы, — адказаў Лемяшонак. — Праз тое, што людзі адступілі. (…) Расія нічога не страціла, затое з'явіліся тысячы пакутнікаў. Я нядаўна вось якую думку зразумеў: калі б Ленін не перамог, Расіі б не было. І ведаеце чаму? Таму што ўсе белыя рухі фінансаваліся англічанамі, французамі, немцамі… Што, яны хацелі, каб Расія была праваслаўнай? Ды нічога падобнага. Яны б яе падзялілі на кавалкі і нічога б не было. Таму Бог так зрабіў, каб Сталін захаваў імперыю. І царква ўзрадавалася!»
Прайшоўся протаіерэй і па ахвярах рэпрэсій. Па-першае, ён упэўнены ў тым, што колькасць ахвяр у СССР перабольшана. Па-другое, сцвярджае, што такія ж маштабныя рэпрэсіі былі і ў Амерыцы, і Англіі. Рэпрэсіі бацюшка называе нашай гісторыяй, якую трэба паважаць.
«Цяпер у Расіі ставяць помнікі Аляксандру III — які быў цар, сапраўдная глыба. І Сталіну, бо гэта быў чалавек не проста так. Пры ім вайну выйгралі, а калі б быў нехта іншы, невядома, чым бы ўсё скончылася. Праваслаўны чалавек глядзіць значна глыбей на гісторыю.»
Ад тэмы Другой сусветнай вайны бацюшка перайшоў да тэмы вайны ва Украіне. І, на здзіўленне публікі, адзначыў, што віна Расіі ў гэтым таксама ёсць.
«Таму што прагледзелі! Чаму ў 2014 годзе дапусцілі?! Трэба было адразу ўводзіць войскі. Там была большая частка на баку Расіі. І ніякай бы вайны не было».
«Цяпер чысціцца ўсё, і культура чысціцца, — дадаў Лемяшонак. — Вы разумееце, усё за мяжу… Ну няхай з'язджаюць усе айцішнікі. Людзі працоўныя, сяляне застануцца. Я думаю, зараз наадварот фарміруецца новая інтэлігенцыя, якая выпакутавана».
Чытайце таксама:
Свята-Елісавецінскі манастыр арганізоўвае кінапрэм'еру расійскай агіткі
Пастар Грэм на «Чыжоўка-арэне» папрасіў маліцца за Лукашэнку і Пуціна. А сам маліўся за Трампа55
Каментары