Як называюць каляднага дзядка ў розных краях? Дзядо Коледа, Ежышэк, Кыш Бабай...
Пакуль беларускія дзеткі гадаюць, хто прыйдзе да іх у госці: святы Мікалай, Зюзя, ці просты Дзед Мароз, у замежнай малечы выбар значна вузейшы: там назвы каляднага госця больш-менш акрэсленныя, ну максімум дзве...
Дзеткі нашых славянскіх суседзяў, украінцаў і палякаў, таксама чакаюць прэзентаў ад святога Мікалая і Діда Мороза. Нашчадкі нашых балтыйскіх суседзяў, літоўцаў, чакаюць Каледу Сенеліса, Каляднага дзеда.
Расія – не адзіная краіна, дзе малыя з нецярплівасцю рыхтуюцца да візіту Дзеда Мароза, напрыклад у большасці былых югаслаўскіх рэспубліках зімняга дараносца ведаюць пад падобным імем, Дзеда Мраз. У Балгарыі таксама дзед, але Дзядо Коледа (Дядо Коледа).
У Чэхіі можа і маюць святога Мікулаша, аднак улюбёны персанаж тамтэйшай дзятвы зусім не ён. Бо як можна чакаць дабротаў ад святога Мікулаша, калі акрамя падаркаў, ён мае паўнамоцтвы бэсціць дзетак за кепскія ўчынкі, якія яны зрабілі на працягу года. Сапраўдным жа ўпадабанцам чэшанятаў з’яўляецца Ежышэк –своеасаблівая варыяцыя на тэму немаўляці Ісуса, які таксама валодае дарам прыносіць калядныя прэзенты.
Фінскія Каляды як і беларускія, маюць паганскія карані, таму з тых часоў засталася спракаветная назва зімняга баства, Ёўлупукі (Joulupukki), што азначае “калядны казёл”, Хіба пад уплывам хрысціянскай традыцыі Ёўлупукі мае звычайную сантаклаусаўскую ўніформу і зусім няма рагоў.
У Галандыі -- банальны святы Мікалай, але дапамагае яму экстравагантны Чорны Піт, чарнаскуры служка, паходжанне якога выводзяць ад служак вешчуноў, якія прыйшлі пакланіцца малому Ісусу. У Малдове і Румыніі ўсіх віншуе Мош Крэчун (Снежны Дзед), як і кожны год не толькі раскідае дарункі, але і змагаецца з ліхімі сіламі, якія ўзначальвае баба Хырка.
З больш экзатычных краінаў: у татарскім краі зімнімі танцамі правіць Кыш Бабай, Зімні Дзед. У Іране двоеўладдзе: узімку, з пачаткам года дарункамі загадвае Баба Ноэль (фран. і перс. Бацька Новы год), але 20 сакавіка, на традыцыйны іранскі новы год яго мяняе Аму Наўруз(Дзядзька Новага дня).
