Суд у Кіеве па справе забойства Паўла Шарамета прыпынілі, бо фігуранты ваююць
Беларускі журналіст загінуў восем гадоў таму.
Суд па справе аб забойстве журналіста «Украінскай праўды», беларуса Паўла Шарамета прыпыніў разгляд да дэмабілізацыі адной з абвінавачаных Яны Дугар, піша «Украінская праўда».
Спыніць справу папрасіла абарона абвінавачаных, бо двое фігурантаў, Яна Дугар і Андрэй Антоненка, служаць у войску. Дугар мабілізаваная, Антоненка — служыць па кантракце.
Баявы медык Дугар удакладніла, што мае кіруючую пасаду і займаецца эвакуацыяй байцоў з поля бою. Антоненка растлумачыў, што ваюе на адным з важных кірункаў. Трэцяя фігурантка Юлія Кузьменка распавяла, што таксама выязджае ў прыфрантавыя рэгіёны як доктарка.
Пацярпелыя — маці і дачка Шарамета, а таксама рэдактар-заснавальніца УП Алена Прытула — падтрымалі адклад разгляду. Іх адвакат таксама служыць ва УСУ, таму раней пацярпелыя ўжо прасілі прыпыніць суд да канца вайны.
***
Беларускі журналіст, а затым адзін з кіраўнікоў «Украінскай праўды» Павел Шарамет загінуў ад выбуху раніцай 20 ліпеня 2016 года. Яму падклалі выбухоўку пад аўтамабіль.
У 2017 годзе журналісты выпусцілі ўласнае расследаванне, у якім высветлілі, што пад домам, дзе жыў Шарамет, у ноч, калі пад машыну заклалі выбухоўку, знаходзіліся падазроныя машыны. Кіроўцам адной з іх быў былы супрацоўнік СБУ Ігар Усціменка. Акрамя таго, работнікі Службы бяспекі «пачысцілі» адзін з сервераў з відэа паблізу дома Шарамета.
12 снежня 2019 года праваахоўнікі паведамілі, што затрымалі трох падазраваных у забойстве: доктара і валанцёра Юлію Кузьменка, музыканта Андрэя Антоненку, вайсковую медсястру Яну Дугар.
22 мая 2020 года следства па справе меркаваных выканаўцаў забойства было завершана. У жніўні 2020 суд прызначыў справу да разгляду. Усе затрыманыя адмаўляюць сваё дачыненне да злачынства і лічаць пераслед палітычным.
Верагодныя заказчыкі забойства названыя не былі. Расследаванне ў дачыненні да іх выдзелена ў іншую справу і працягваецца.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары