Надзея Ермакова ездзіць на аўтобусе: У спіну не плююць, але аднойчы з Ярмошынай пераблыталі
Былая старшыня Нацбанка расказала, як жыве на пенсіі.
Надзея Ермакова цяпер ездзіць на грамадскім транспарце.
«Заўсёды марыла бачыць свет такім, а то ў асноўным даводзілася яго сузіраць з задняга сядзення аўто», — жартуе яна ў інтэрвю «СБ. Беларусь сегодня».
«Не паверыце: мне хацелася на аўтобус, не толькі калі пачала пенсіянерскі лад жыцця, але і калі працавала. Іншая рэч, калі раніцай трэба быць у Хоцімску, а пасля абеду ў Мінску на нарадзе, нічога не паспявала б.
У грамадскім транспарце цікава.
Сядзіш, у акенца глядзіш, а ззаду жанчыны шушукаюцца: «Гэта ж Ермакова!» Бывала, падыходзяць, вітаюцца, па імені і імені па бацьку звяртаюцца. І я радуюся, што мне ў статусе «экс» у спіну не плююць, паважліва ставяцца. Адзін раз, праўда, з Лідзіяй Ярмошынай пераблыталі».
Аднойчы Ермакову выводзілі з аўтобуса кантралёры.
«Я дрэнна вывучыла ўмовы дзеяння праязных дакументаў. Купіла на зададзены лік паездак, ды не звярнула ўвагі, што выкарыстоўваць іх трэба на працягу лімітаванага часу. Зайшла ў аўтобус, машынальна прыклала да валідатара, а тут кантралёры. Не разумею, чаму ў мяне паездка не аплачана, калі іх аж 28 заставалася!
І вось мяне на выхад пад белы ручанькі прама ля Палаца Незалежнасці… Так сорамна! Тлумачу, што я былая старшыня Нацбанка, прашу выпісаць мне штраф і тут разумею, што нават пашпарта з сабой няма, а грошай толькі на жэтон з талонам…
У выніку прадалі мне кантралёры талончык па цане без вадзіцельскай нацэнкі і папрасілі «больш так не жартаваць». А я не жартую!»
Былая старшыня Нацбанка кажа, што ў маладосці марыла не пра кар'еру, а пра сям'ю і пяцярых дзяцей. У выніку вырасціла дзвюх дачок.
Ермакова двойчы была замужам. «Але за мужам сябе, ці, як яшчэ кажуць, за каменнай сцяной, ніколі не адчувала. Цяпер абодвух маіх былых мужоў няма ў жывых, але я за іх шчыра малюся. Другому мужу вельмі падабалася мая пасада старшыні Нацбанка. Ён ганарыўся, што я на такой пасадзе».
Заўважае:
«З журналістамі я размаўляць не люблю. Людзі вы цікавыя, але навошта каб пра мяне пляткарылі ўсе вакол?»
На пенсіі Ермакова (ёй 71 год) ходзіць на мерапрыемствы праўладнага Беларускага саюза жанчын, ветэранскай арганізацыі Беларусбанка. Яе таксама паставілі ў прэзідыум Усебеларускага народнага сходу.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»2
Каментары
На Ярмошынай клейма недзе ставіць, бо гэта пры яе кіраванні ЦВК была выпрацавана сістэма жэстачайшых фальсіфікацый