Калі вы не хочаце заставацца ў летнюю спёку ў горадзе, прапануем некалькі месцаў, дзе можна камфортна адпачыць ля вады.
Лета ў самым зеніце. Слупок тэрмометра ўпэўнена набліжаецца да лічбы ў 30 градусаў. Набліжаюцца выхадныя ці адпачынак і хочацца вырвацца з гарадскога тлуму бліжэй да прыроды.
Прапануем вам некалькі пляжаў па-за Мінскам, якія ў апошнія гады афіцыйна былі прызнаныя найлепшымі месцамі адпачынку краіны па выніках конкурсу, што праводзіць Міністэрства прыродных рэсурсаў і аховы навакольнага асяроддзя. Адным з галоўных крытэрыяў для перамогі з'яўляецца ўпарадкаванне пляжа.
Пляж №4 на вадасховішчы Вяча Мінскага раёна
Каардынаты: 54.057900, 27.618590
Пляжы на Вячы даўно вядомыя жыхарам сталіцы і наваколля. Яны маюць вялікі памер і, здаецца, могуць змясціць усіх ахвотных. Але найбольш уладкаваны — пляж №4.
У апошнія гады была праведзена яго рэканструкцыя. На пляжы з'явілася некалькі сучасных дзіцячых гульнявых пляцовак. Для аматараў шашлыкоў устаноўленыя стацыянарныя мангалы.
Пляж парку сямейнага адпачынку «Лап-Ландыя» ў пасёлку Барок Любанскага раёна
Каардынаты: 52.7596967, 27.778899
Пляж знаходзіцца ў парку сямейнага адпачынку «Лап-Ландыя» і працуе ад 10-й ранку да 8-й гадзіны вечара. Наведванне каштуе 10 рублёў для дарослых і 5 рублёў для дзяцей з 3 да 13 гадоў.
Наведвальнікі могуць узяць напракат шэзлонгі, катамараны. Вялікая кампанія можа размясціцца ў альтанцы, абсталяванай мангалам. Акрамя гэтага, можна арандаваць дамок на беразе возера.
На пляжы ёсць спецыяльная зона забаў для дзяцей і зона для купання. Акрамя гэтага, малых парадуе «жывы куток» з рознымі звярамі.
Пляж абсталяваны туалетамі і душавымі.
Пляж на возеры Белае ў Пастаўскім раёне
Каардынаты: 55.152469, 26.852440
Пляж абслугоўваецца спартыўна-турыстычным комплексам «Азяркі». Да паслуг наведвальнікаў тут лежакі, катамараны і лодкі. Напракат можна ўзяць мангал і арандаваць альтанку ці лазню.
На тэрыторыі комплексу знаходзяцца спальныя домікі. Кошт жыцця ў аднамесным нумары з усімі выгодамі абыдзецца ў 32 рублі. За чатырохмесны нумар без выгодаў вы заплаціце 60 рублёў.
Акрамя адпачынку на вадзе, наведвальнікам прапануюцца паслугі ціра, вяровачнага гарадка, спуск на тралеях і скаладром. Атракцыёны працуюць з серады па пятніцу з 14-й да 20-й гадзіны, а ў выхадныя з 12-й да 20-й.
Пляж вадасховішча Паперня санаторыя «Ружанскі»
Кааардынаты: 52.895502, 24.839167
У водгуках пра гэты пляж людзі пішуць, што ён «як у Турцыі». Белы пясок, бясплатныя шэзлонгі, пераапранальні, прыбіральня, мыйкі для ног, фантанчыкі для піцця, пляцоўкі для гульні ў валейбол і футбол.
Наведвальнікі могуць скарыстацца з паслуг міні-бара, узяць напракат лодку ці катамаран.
Людзі пішуць, што проста паміж адпачывальнікамі ходзяць лебедзі і качкі з качанятамі.
Пляж на Зэльвенскім вадасховішчы
Каардынаты: 53.145250, 24.823056
Пляж утрымліваецца ў камунальнай уласнасці і знаходзіцца на беразе самага вялікага ў Гродзенскай вобласці вадасховішча. На ім прадугледжаны спецыяльны пантон для заходу ў ваду людзей з абмежаванымі магчымасцямі.
Для актыўнага адпачынку на пляжы ёсць валейбольная і футбольная пляцоўкі. Дзеці могуць пазабаўляцца на горках і арэлях. Для іх таксама створана асобная месца для купання.
Пляж мае ўсе неабходныя аб'екты для камфортнага адпачынку (прыбіральні, душавыя, пераапранальні). Адпачывальнікі могуць узяць напракат катамаран, скарыстацца шэзлонгамі.
А на якім пляжы адпачываеце вы?
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм14
Каментары
- A my pracujem, adpačyvajuc abiboki, lajdaki i piensyjanery...