У Петрыкаўскім раёне мужчына некалькі гадоў гуляў з судовымі выканаўцамі ў даганялкі. Але ўрэшце прайграў
Жыхар Петрыкаўскага раёна некалькі гадоў хаваўся ад судовых выканаўцаў, не жадаючы плаціць крымінальны штраф памерам больш за 600 рублёў. Пазбягаць адказнасці яму дапамагала геаграфічнае размяшчэнне пасёлка і сябры-інфарматары, паведамляе Галоўнае ўпраўленне юстыцыі Гомельскага аблвыканкама.
Рэч у тым, што да пасёлка Снядзін на Прыпяці можна дабрацца рознымі спосабамі: праз паромныя пераправы, па шашы і пешшу прасёлкавымі сцежкамі. Калі супрацоўнікі аддзела прымусовага выканання дабіраліся да месца адным шляхам, чалавек уцякаў праз іншы. І так працягвалася, пакуль судовыя выканаўцы не падзяліліся і не зайшлі ў пасёлак з розных напрамкаў.
Чакаючы гасцей з боку пераправы, вясковец пусціўся наўцёкі па ваколіцах, дзе яго і злавілі. Мужчына, аднак, сваю паразу прызнаваць не жадаў і патлумачыў, што мог бы выкруціцца і гэтым разам, аднак жа захацеў падмацавацца алкаголем, увайшоў у азарт і згубіўся ў часе.
Як бы там ні было, але доўга няўлоўнага даўжніка ўрэшце даставілі ў суд, замяніўшы яму штраф на арышт.
Цяпер чытаюць
«Я тая самая ў футры». Маладая швачка працавала ў футры, пакуль дзяржТБ расказвала, што на фабрыцы ў Жлобіне не холадна11
Каментары