Беларус год не карыстаецца шампунем — і задаволены сваімі валасамі
Дзяніс Зелянко расказаў у фэйсбуку, як пайшоў на радыкальныя касметычныя меры. Мужчына больш за год не карыстаецца шампунем і кажа, што ягоныя валасы за гэты час зрабіліся толькі лепшымі.
Калі Дзяніс распачынаў той эксперымент, ён скардзіўся на сальныя валасы, перхаць і сверб скуры галавы. Шампуні супраць перхаці часткова дапамагалі — Дзяніс карыстаўся і мас-маркетаўскімі прадуктамі накшталт Head&Shoulders, і лячэбным шампунем «Нізарал». Але ж скура галавы з часам звыкалася да шампуняў, і даводзілася шукаць новы сродак.
Адпаведна, Дзяніс шукаў магчымасць вырашыць праблемы з валасамі найпрасцейшым чынам, і, на думку мужчыны, такім варыянтам магла б быць адмова ад шампуня. Беларус тлумачыць такі падыход тым, што ў старажытных людзей не было ніякіх шампуняў і валасы, як і скура галавы, самі могуць падтрымліваць сябе ў парадку. Таму Дзянісу было цікава паглядзець, як валасы будуць сябе адчуваць «на завадскіх наладах».
Спачатку было складана:
«Праз некалькі дзён пасля апошняга душа з шампунем я адзначыў нарастанне тлушчу на валасах, што лагічна. Наступныя душы ўжо без шампуня трохі збівалі тую тлустасць.
Першыя пару тыдняў было выразнае адчуванне шапачкі на галаве. Адчуванні крычалі — маўляў, у нас вельмі тлустая галава, неадкладна налі шампунь!»
Дзяніс успрыняў тыя адчуванні як сігнал, што на скуру яго галавы вярнуўся абарончы бар’ер. Так мужчына апісвае тлушч-себум, які вырабляюць сальныя залозы на галаве. Той себум абараняе волас і скуру галавы, а шампунь, адпаведна, змывае яго лішак.
Пару тыдняў, прызнаецца Дзяніс, ён «хадзіў і пакутаваў», бо валасы былі сальныя і цяжкія. А потым здарылася нешта цікавае:
«Пасля наступных душаў колькасць тлушчу стала памяншацца, з’явіўся бляск на валасах, яны зрабіліся мяккія і рассыпістыя, нібыта пасля шампуня.
Сістэма прыйшла ў раўнавагу. Колькасць тлушчу, які выпрацоўваецца, зменшылася, бо ён цяпер не змываўся мыйнымі сродкамі. А значыць, яго не трэба інтэнсіўна папаўняць».
Цяпер Дзяніс мые валасы толькі чыстай вадой, і яго валасы выглядаюць аднолькава, колькі б часу ні прайшло з апошняга мыцця. Ніякага адчування сальнасці таксама няма, запэўнівае мужчына ў фэйсбуку.
Дзяніс раіць тым, хто прачытае яго пост, таксама паспрабаваць хаця б часова адмовіцца ад мыйных сродкаў для валасоў.
«Абсалютная большасць не ведае, якія ў іх на самой справе валасы. Бо каб гэта даведацца, трэба зняць хімічную нагрузку з валасоў, даць скуры галавы некалькі тыдняў на стабілізацыю сістэмы і выхад на арыгінальны натуральны рэжым».
Цяпер пад пастом Дзяніса больш за паўтысячы каментароў. Шмат хто паставіўся да яго ідэі крытычна:
«Трусы мяняць — таксама блазнота, я лічу».
«Уяўляю, як ад валасоў смярдзіць».
А некаторыя расказвалі, што спрабавалі падобныя эксперыменты.
Дзяніс удакладняе ў каментарах, што сам сумняваўся наконт паху, таму часам паказваў свае валасы знаёмым і прасіў апісаць іх стан. Ніякага смуроду тыя не знаходзілі, а вось перхаць заставалася, але ў значна меншай колькасці.
На прапанову самім адмовіцца ад шампуняў знаёмыя жанчыны адказвалі, што не змогуць на гэта пайсці.
Цяпер Дзяніс мые валасы кожны раз, калі трапляе ў душ — але толькі вадой.
«Наша Нiва» — бастыён беларушчыны
ПАДТРЫМАЦЬ
Каментары