Z-ваенкар Юрый Падаляка распавёў, што вядома пра падзеі на Курскім кірунку на вечар 20 жніўня.
![](http://nashaniva.com/img/w840d4webp1/photos/z_2024_08/-ndde8.jpg.webp)
Падаляка прызнаецца, што на Льгоўска-Суджанскім участку змены не на карысць расіян.
Паводле інфармацыі ваенкара, украінцы перакінулі рэзервы (батальён 95-ай ДШБр, узброены нямецкімі БМП «Мардэр») і спрабуюць узяць пад свой кантроль Малую Локню.
«Перад гэтым ён [праціўнік] абышоў нашы пазіцыі паміж гэтым сялом і Рускім Парэчным, перарэзаўшы дарогу паміж імі, і такім чынам узяў часткі 18-ай мсд [мотастралковай дывізіі] у аператыўнае атачэнне. Таксама ідуць яго спробы адначасова ажыццявіць і ахоп Рускага Парэчнага, каб прымусіць наш гарнізон тут адысці», — піша Падаляка.
Як ён сцвярджае, цяпер там «вельмі цяжкі ідзе бой».
«Працуе наша авіяцыя, артылерыя, БПЛА. Але нават гэта пакуль не адкінула праціўніка. Той упарта лезе наперад», — канстатуе ваенкар.
Са словаў Падалякі, украінскія войскі нарошчвалі ціск таксама на Глушкоўскім кірунку, дзе лагістыку расіян ускладніла знішчэнне ўсіх мастоў цераз Сейм.
У кірунку Гір'яў-Белага, са слоў ваенкара, зменаў у лініі баявога сутыкнення не адбылося.
Каментары