Айцішнік стаў «пагрозай бяспецы» ў Літве з-за працы на БелАЭС па размеркаванні
Выданне Devby.io піша пра яшчэ адну гісторыю анулявання ДНЖ у Літве для беларусаў, якая ўскладняецца тым, што ў дзяцей скончыліся беларускія пашпарты, а праязныя дакументы ім не выдалі.
Цяпер ІТ-спецыяліст з Беларусі Леанід, які пражыў з сям’ёй больш за два гады ў Вільні, шукае рашэнне, як і дзе жыць далей. На мінулым тыдні Літва прызнала яго «пагрозай нацыянальнай бяспецы», у выніку чаго анулявалі ягоны дазвол на жыхарства (ДНЖ). Звычайная на сёння сітуацыя ўскладняецца тым, што вярнуцца ў Беларусь сям’я не можа, і праблема не толькі ў гэтым.
У чым заключаецца «пагроза»
Як расказаў выданню сам Леанід, ён па адукацыі фізік, выпускнік БДУ, і ў 2015 годзе па размеркаванні трапіў на БелАЭС, дзе фактычна адпрацаваў два гады. У 2017 годзе ў яго нарадзілася дачка, і ён на тры гады пайшоў у дэкрэтны адпачынак. Пасля дэкрэту, вясной 2020 года, ён звольніўся з АЭС і перайшоў у ІТ. У студзені 2022 года Леанід прыняў прапанову ад літоўскай кампаніі і пераехаў з сям’ёй у Вільню.
Усё ішло добра: сіняя картка, кватэра побач са школай і секцыямі для дзяцей (іх ужо двое), жонка таксама знайшла працу ў ІТ. Як і іншыя мігранты з Беларусі, Леанід у 2022 годзе запоўніў анкету пра мінулыя работы і добрасумленна пазначыў працу на АЭС. У 2023 годзе гісторыі анулявання ДНЖ тых беларусаў, якія служылі ў войску па кантракце або працавалі на стратэгічных аб'ектах Беларусі ці Расіі, выклікалі занепакоенасць, але да Леаніда тады не было прэтэнзій. Праблема ўзнікла нечакана.
Здавалася, што пагроза мінула
У лютым 2024 года ў дзяцей скончыўся тэрмін ДНЖ, а ў маі 2024-га — беларускіх пашпартоў. Бацькі звярнуліся ў Дэпартамент міграцыі (Мігрыс) і прадставілі доказы таго, што яны не могуць паехаць у Беларусь для абмену дакументаў. У выніку дзецям выдалі новыя карткі, якія дзейнічалі да 2025 года, калі заканчвалася і сіняя картка Леаніда.
«У 2023 годзе мы моцна перажывалі, але калі нам працягнулі дзіцячыя ДНЖ, мы супакоіліся», — кажа Леанід.
Але не
Праз некалькі месяцаў пасля гэтага дарослыя падалі заяўку на праязныя дакументы для дзяцей, але замест іх праз 3,5 месяца Леанід атрымаў паведамленне аб ануляванні свайго ДНЖ з-за працы на БелАЭС, што робіць яго «пагрозай нацыянальнай бяспецы Літвы». У дадатак ён атрымаў забарону на ўезд у краіну.
З-за таго, што жонка і дзеці афармляліся разам з Леанідам «прычэпам», іх ДНЖ таксама анулявалі.
Сям’я павінна пакінуць Літву ў найбліжэйшы час. У Беларусь вярнуцца яны не могуць, а пераехаць у іншыя краіны пакуль могуць толькі дарослыя (іх пашпарты яшчэ дзейнічаюць), але без дзяцей.
Магчымыя рашэнні
«Зразумела, што без дзяцей мы нікуды не паедзем, — кажа Леанід. — Зараз мы кансультуемся з юрыстамі і НКА, каб вызначыць далейшыя крокі. Магчыма, будзем падаваць у суд, але чакаць рашэння суда ў Літве мне, верагодна, не дазволяць. Ідэальны варыянт — падацца на новы ДНЖ для сям'і, а сам Леанід мог бы працаваць з трэцяй краіны і спрабаваць вярнуцца пасля выйгрышу ў судзе».
Цяпер сям’я атрымлівае супярэчлівую інфармацыю ад юрыстаў: ад «паспяховых апеляцый не было» да «такія справы можна вырашыць».
Магчыма, Леаніду давядзецца падавацца на міжнародную абарону.
Лічбы, ад якіх страшна. Больш за 280 тысяч беларусаў атрымалі дазволы на жыццё ў ЕС у 2023. Больш толькі ва ўкраінцаў
Падлічылі, колькі беларусаў жыве ў Польшчы і Літве
Літва ідзе на саступкі: дазволіць заязджаць на беларускіх нумарах, калі гаспадар за рулём і мае ДНЖ або візу Літвы
Рашэнне аб ануляванні ДНЖ у Літве больш не прыпыняецца пры абскарджанні ў судзе. Чалавек мусіць выехаць з краіны
2025 год можа стаць для Беларусі годам перамен, якіх беларусы баяліся2
Каментары