Правяраем Галоўчанку. Ці сапраўды сёлета патаннелі інгрэдыенты для аліўе?
Прэм'ер-міністр Беларусі Раман Галоўчанка заявіў, што традыцыйная святочная салата ў гэтым годзе патаннела. Узялі лічбы Белстата і праверылі словы топ-чыноўніка.
Падобныя падлікі мы робім штогод. Напрыклад, летась інфляцыя порцыі аліўе склала амаль 6%, у 2022-м — 14, а тры гады таму наогул 20.
Ізноў нагадваем, што гэта не з'яўляецца сур'ёзным даследаваннем. Інфармацыя Белстата не ўлічвае сярэднія цэны на некаторыя прадукты кшталту салёных агуркоў ці кансерваванага гарошку (замест іх узятыя цэны з катэгорыі «кансерваваная гародніна»). Звесткі статыстычнага органа абагульненыя: не ўлічваюць, напрыклад, тлустасць маянэзу, катэгорыю яек і г. д. Таксама не ўлічваліся выдаткі на прыгатаванне — камунальныя паслугі ў Беларусі не таннеюць — а таксама імаверныя зніжкі ў розных гандлёвых сетках.
Аліўе
Для разліку цаны салаты «Аліўе» мы, як звычайна, бярэм наступны рэцэпт: кансерваваныя агуркі (500 грамаў), гарошак (380 грамаў), бульба (500 грамаў), морква (200 грамаў), курыныя яйкі (4 штукі), вараная каўбаса (300 грамаў), маянэз (200 грамаў), рэпчатая цыбуля (100 грамаў).
| Аліўе | Лістапад 2023 | Лістапад 2024 | Інфляцыя, % |
| Кансерваваныя агуркі, 1 кг (порцыя) | 9,1 (4,55) | 9,74 (4,87) | 7,03 |
| Гарошак, 1 кг (порцыя) | 9,1 (3,46) | 9,74 (3,70) | 7,03 |
| Бульба, 1 кг (порцыя) | 0,75 (0,38) | 1,04 (0,52) | 38,67 |
| Морква, 1 кг (порцыя) | 1,03 (0,21) | 1,00 (0,20) | -2,91 |
| Яйкі, дзясятак (порцыя) | 3,23 (1,29) | 3,45 (1,38) | 6,81 |
| Вараная каўбаса в/г, 1 кг (порцыя) | 9,37 (2,81) | 9,70 (2,91) | 3,52 |
| Маянэз, 1 кг (порцыя) | 8,73 (1,75) | 9,11 (1,82) | 4,35 |
| Рэпчатая цыбуля, 1 кг (порцыя) | 1,35 (0,14) | 1,37 (0,14) | 1,48 |
| Сума за порцыю | 14,57 | 15,54 | 6,66% |
Атрымліваецца, што замест абяцанай Раманам Галоўчанкам дэфляцыі, порцыя аліўе за гэты год з улікам ручнога стрымання цэн падаражэла амаль на рубель. Прычым з інгрэдыентаў салаты за год патаннела толькі морква, а найбольшую інфляцыю зазнала бульба.
Рост цэн на аліўе супадае з індэксам цэн на харчовыя тавары па падліках Белстата.
Селядзец пад шубай
Для ацэнкі кошту шубы ўзялі такі рэцэпт: салёны селядзец (350 грамаў), бульба (400 грамаў), буракі (350 грамаў), морква (200 грамаў), курыныя яйкі (2 штукі), рэпчатая цыбуля (100 грамаў), маянэз (300 грамаў).
| Селядзец пад шубай | Лістапад 2023 | Лістапад 2024 | Інфляцыя, % |
| Салёны селядзец, 1 кг (порцыя) | 8,97 (3,14) | 10,04 (3,51) | 11,93 |
| Бульба, 1 кг (порцыя) | 0,75 (0,30) | 1,04 (0,42) | 38,67 |
| Буракі, 1 кг (порцыя) | 1 (0,35) | 0,99 (0,35) | -1 |
| Морква, 1 кг (порцыя) | 1,03 (0,21) | 1,00 (0,20) | -2,91 |
| Яйкі, дзясятак (порцыя) | 3,23 (0,65) | 3,45 (0,69) | 6,81 |
| Рэпчатая цыбуля, 1 кг (порцыя) | 1,35 (0,14) | 1,37 (0,14) | 1,48 |
| Маянэз, 1 кг (порцыя) | 8,73 (2,62) | 9,11 (2,73) | 4,35 |
| Сума за порцыю | 7,40 | 8,04 | 8,65% |
У адрозненне ад папярэдніх двух гадоў, шуба падаражэла мацней за аліўе. У першую чаргу — за кошт росту цэн на асноўныя інгрэдыенты: бульбу і селядзец. Але ўсё роўна гэтая салата амаль у два разы таннейшая за аліўе.
Напішыце ў каментарах, як па вашых адчуваннях, змяніліся за гэты год цэны на навагодні стол. Ці згодныя вы з заявамі Рамана Галоўчанкі?
Каментары