Групы «Антыквадробераў», якія нібыта ствараюцца па ўласнай ініцыятыве расійскіх грамадзян і падлеткаў, сталі адсочваць і збіваць людзей, якія займаюцца квадробікай. Па інфармацыі дзяржаўных медыя, новы радыкальны рух пачаў распаўсюджвацца па ўсёй Расіі, некаторыя з іх натхняюцца ПВК «Вагнер».
У Расіі ўжо некалькі месяцаў ідзе актыўная прапагандысцкая кампанія супраць квадробераў — бяскрыўднай субкультуры, папулярнай пераважна сярод дзяцей і падлеткаў, якія імітуюць паводзіны жывёлаў, носячы адпаведныя хвасты, маскі, вушкі і гэтак далей. Па тэлевізары і ў інтэрнэце прапаганда звязвае падобныя паводзіны з псіхічнымі адхіленнямі (нават з дыверсійнымі дзеяннямі Захаду) і заклікае бацькоў адводзіць сваіх дзяцей-квадробераў да псіхіятраў.
Праўладная расійская газета «Маскоўскі Камсамолец» канстатуе факт істотнага росту агрэсіі расійскіх грамадзян да феномену квадробераў і паведамляе аб з'яўленні ў Расіі груп новага радыкальнага руху «Антыквадробераў» (ці «АКВД»), якія палююць на любога, хто быў заўважаны ў квадроберстве.
«Дзяцей з вушкамі ловяць, абражаюць і збіваюць. Да агрэсіўных падлеткаў далучыліся і дарослыя, верагодна, не зусім адэкватныя людзі, якія ўспрымаюць квадробераў як сацыяльна дазволеную мішэнь для выкіду ўнутранай агрэсіі», — піша «Маскоўскі Камсамолец».
Па словах апытаных газетай дзіцячых псіхіятраў, вось ужо некалькі месяцаў бацькі, напужаныя інфармацыяй пра тое, што квадробіка вядзе да псіхіятрычных захворванняў, вядуць сваіх дзяцей на прыём да спецыялістаў праверыць іх псіхічнае здароўе.
Дзеці-квадроберы з усёй краіны скардзяцца дактарам, што на іх абвясцілі сапраўднае паляванне.
«З’явіліся групы хлопцаў, якія называюць сябе «АнтыКВД». Пераследуюць мяне і маіх сяброў, абзываюць, адзін з іх плюнуў мне ў патыліцу. Іншай дзяўчынцы гэтыя «антыкі» разбілі нос, давялося выклікаць хуткую. Цяпер антыквадроберскія відэа запаўняюць усе відэахостынгі», — цытуе адзін з апытаных газетай дзіцячых псіхіятраў аповед дзяўчыны-квадробера.
Іншыя дзеці і падлеткі з розных рэгіёнаў Расіі, якія займаюцца квадробікай, пацвердзілі «Маскоўскаму Камсамольцу», што на іх пачалі нападаць групы «аквдэшнікаў».
Аля з горада Чарэмхава Іркуцкай вобласці падзялілася, як на іх сустрэчу па квадробіцы напалі незнаёмыя хлопцы.
«Яны сядзелі на лаўцы, пілі піва, а мы проста бегалі. Гэтыя хлопцы глядзелі на нас, потым падышлі і збілі аднаго з нашых хлопчыкаў. Астатнія ўцяклі», — дзеліцца Аля.
Ілля з горада Ніжнекамск Рэспублікі Татарстан распавёў «МК», як ён у жніўні наведваў трэніроўку па квадробіцы і заўважыў, як на ягоных сябраў пачалі паляванне.
«Я падышоў бліжэй і ўбачыў, як натоўп старэйшых хлопцаў бегае з палкамі за квадроберамі, якія толькі пачалі сваю трэніроўку. Я схаваўся за дом. Туды не пайшоў, інакш і мне дасталася б. Хлопцаў з палкамі спужала маці аднаго з квадробераў. З таго дня я нашу электрашокер у кішэні», — успамінае Ілля.
А Даніла з Санкт-Пецярбурга апісаў газеце інцыдэнт, які адбыўся на ягоных вачах у пачатку верасня падчас трэніроўкі. Дарослы мужчына аблаяў мацюкамі і збіў васьмігадовую дзяўчынку за заняткі квадробікай.
«Спачатку ён на яе лаяўся матам, крычаў, што яна псіхічна хворая. А потым падышоў, ударыў па галаве, сарваў маску і выкінуў. Паспрабаваў адарваць і хвост, але ўмяшаўся мінак, які адвёў гэтага мужчыну і ўдарыў яго. Дзяўчынка стаяла побач і плакала, а мінак спрабаваў яе супакоіць», — апісвае Даніла.
Нагадаем, што нядаўна ў эфіры расійскага праваслаўнага тэлеканала «Спас» расійскі Z-прапагандыст Сяргей Міхееў, часты госць праграм Уладзіміра Салаўёва, назваў феномен квадробераў «калектыўным вар'яцтвам і садамаза-хрэнню, якую прыдумалі на Захадзе для прыгнёту дзяцей і непаўналетніх».
Прапагандыст казаў таксама, што квадроберы, прыпадабняючыся жывёлам, «адыходзяць ад божай задумы, што ўзвялічвае чалавека, і трапляюць пад уплыў Сатаны, які пашле іх на забой».
Тую ж думку падтрымліваюць і лукашэнкаўскія прапагандысты, якія наперабой пачалі крытыкаваць квадробераў і іх бацькоў, паставіўшы дзіцячае хобі ў адзін шэраг з сатанізмам (а таксама гомасэксуалізмам і прыёмам наркотыкаў).
Феномен квадробераў пайшоў ад квадробікі (ад лац. quattuor — «чатыры» і англ. aerobics — «аэробіка») — неафіцыйнага віду спорту родам з Японіі, у якім як дзеці, так і дарослыя перамяшчаюцца на карачках, імітуючы рухі жывёл. Падчас заняткаў прынята выкарыстоўваць маскі і накладныя хвасты ўласнай вытворчасці. Часцей за ўсё квадроберы — гэта дзеці і падлеткі 7-14 гадоў, для якіх гэта хутчэй гульня, чым спартыўнае спаборніцтва.
У міліцыі расказалі, за што будуць караць квадробераў
Квадробераў прыдумалі, каб яны прынеслі Захаду ў зубах суверэнітэт Беларусі — новая версія прапаганды
Не квадроберамі адзінымі. Нефармалы 2000-х расказалі, чаму было небяспечна станавіцца эма і як з'яданне корму з сабачай міскі дапамагае інтравертам
Каментары
Любера качкі казанскія тяп ляпы супраць хіпі панкаў Маскваленінград
Дарэчы Ні чутна пакуль аб рэйдах на жыруючыя Патрыкі у Масква ?? Чамусці ..гальмуют