Восень — найлепшы час, каб ствараць не толькі шматслойныя вобразы, але і стылістычна разнастайна ўцяпляць ногі. На які восеньскі абутак звярнуць увагу, піша Onliner.
Жакейскія боты
Жакейскія боты таксама маюць назву «рыдынгі». Гістарычна гэта боты для верхавой язды. У другой палове XX стагоддзі жакейскія боты сталі модным атрыбутам. Хіпі іх насілі з кароткімі сукенкамі.
Жакейскія боты знаходзяцца па-за трэндам. Гэта класічная мадэль, якая не можа сысці ў антытрэнды. Але яны патрабуюць вызначанага стылю ў гардэробе: стрыманага, класічнага, жаноцкага. Яны дрэнна міксуюцца са спортам і аверсайзам. Затое з дапамогай іх можна лёгка стварыць вобраз каралеўскай асобы, якая ідзе займацца высакароднай справай — конным спортам. Не выпадкова ў такіх ботах часта можна ўбачыць чальцоў ангельскай каралеўскай сям'і.
Казакі
Казакі таксама адносяцца да абутку, які захоўвае актуальнасць і лічыцца базавым, па-за трэндам. Існуе мноства варыяцый казакоў: ярка выяўленыя, спрошчаныя, замшавыя, з узорамі, скураныя, высокія, сярэднія, нізкія. І кожны з іх сёння актуальны.
Выбіраючы казакі, трэба арыентавацца на пераважную стылістыку ў гардэробе: чым больш мінімалістычны гардэроб, тым больш спрошчанай павінна быць мадэль казакоў.
Дарэчы, казакі гістарычна таксама з'яўляліся абуткам для верхавой язды. Сёння яны шчыльна асацыююцца з каўбойскім абуткам. І сапраўды, у 30-х гадах мінулага стагоддзі іх забралі да сябе ў гардэроб амерыканскія каўбоі. З таго часу іх асацыююць выключна са стылем вестэрн.
Але сёння казакі можна спалучаць з чым заўгодна: з кэжуалам, жаноцкасцю і нават дзелавым стылем. Яны ўносяць разыначку ў любы вобраз.
Чоперы
Чоперы — гэта байкерскія боты з квадратным мысам і металічнымі дэталямі па баках. Раней чоперы былі прадметам гардэроба выключна мотааматараў. Але пару гадоў назад сфера моды вырашыла, што гэты брутальны абутак будзе выдатна глядзецца не толькі з байкерскім абмундзіраваннем, але і з сукенкамі ў стылі боха, ды і наогул са ўсімі паўсядзённымі вобразамі.
Нягледзячы на ярка выяўленую байкерскую стылістыку, чоперы добра міксуюцца з іншымі стылямі ў адзенні. У мінулым годзе іх многія насілі з кароткімі спадніцамі, сукенкамі. У гэтым годзе спіс класных спалучэнняў пашырылі.
У цэлым сёння назіраецца тэндэнцыя пад назвай «тэорыя няправільнага абутку». Тэорыя абвяшчае, што ўбор глядзіцца больш стыльна, калі спалучаць яго з зусім нечаканым абуткам.
Боты-трубы з вострым мысам
Адзін з самых актуальных варыянтаў восеньскага абутку ў гэтым сезоне — боты з шырокай халявай, што складаецца ў гармонік.
Адмысловы шык — насіць іх, ствараючы эфект алоўка ў шклянцы. Гэта значыць боты не павінны сядзець занадта шчыльна да галёнкі. Толькі ў такім выпадку гэты абутак будзе глядзецца спакойна і стыльна.
Такая мадэль будзе эфектна спалучацца і з запраўленымі шырокімі джынсамі, і з калготкамі.
Бардовы абутак
Напэўна вы чулі аб тым, што ў модзе бардовы колер. Нават калі вы не цікавіцеся модай, вы напэўна ўжо маглі заўважыць засілле бардовых адценняў у крамах, на вуліцах, у Instagram, Pinterest.
Бардовы, вінны, бургундзі, Gucci Rosso — у гэтага адцення шмат назваў і інтэрпрэтацый. Ён універсальны, стрыманы, але пры гэтым акцэнтны.
Батфорты
І зноў не абысціся без паглыблення ў гісторыю. У наш час батфорты шчыльна асацыююцца з 2000-мі, а таксама з адкрытымі і нават правакацыйнымі жаночымі ўборамі. Але ў XV стагоддзі іх насілі мужчыны — як правіла, вайскоўцы і тыя, хто ездзіў верхам. Не вельмі цнатлівы флёр гэты абутак здабыў у канцы XIX стагоддзя, калі яго аблюбавалі жанчыны лёгкіх паводзін. Але сёння батфорты цалкам сабе штодзённы абутак.
Класічныя бацільёны
Трэнды прыходзяць і сыходзяць, а класічныя жаночыя батыльёны актуальныя заўсёды. Адметнай рысай батыльёнаў з'яўляецца абцас і вышыня крыху вышэй шчыкалаткі.
У гэтым сезоне варта звярнуць увагу на варыянт з авальным мысам, які паўтарае форму пальцаў. У такім абутку павінна быць максімальна камфортна. Чаго не скажаш аб бацільёнах з вострым мысам, у якіх часцяком пальцы крычаць аб дапамозе. Але прыгажосць, як вядома, патрабуе ахвяр.
Дарэчы, пры выбары такога абутку зважайце на абцас. Ён павінен знаходзіцца пасярэдзіне пяткі — такім чынам вага цела размяркоўваецца правільна і прасцей хадзіць.
Чэлсі на невысокай платформе
Чэлсі прыйшлі ў сусветную моду з Англіі: у першай палове XIX стагоддзя англійскі шавец паспрабаваў стварыць абутак, які можна не зашпіляць, а проста нацягваць на нагу. Вынаходства ўсім спадабалася і пайшло ў народ.
Сёння адметнымі рысамі чэлсі з'яўляюцца гумовыя ўстаўкі па баках, плоская падэшва і пятля ззаду.
Калі пару гадоў таму трэндам былі чэлсі на масіўнай трактарнай падэшве, то сёлета іх дызайн злёгку супакоіўся, стаў больш класічным. Выбірайце чэлсі на невялікай платформе, з авальным або квадратным мысам.
Каментары