Улады хваляцца, што ў Беларусь па бязвізе прыехаў мільён еўрапейцаў. Няўжо праўда?
Разбіраемся ў методыцы падліку замежнікаў.
З 15 красавіка 2022 года ў Беларусі дзейнічае бязвізавы рэжым для грамадзян суседніх заходніх краін. Паводле падлікаў Дзяржпагранкамітэта, за гэты час нашу краіну наведалі 1 мільён 8 тысяч чалавек.
Разбіўка па краінах такая:
| Літва | 578554 |
| Латвія | 316156 |
| Польшча | 101447 |
Ёсць яшчэ 11 883 чалавек — грамадзяне іншых краін Еўрасаюза, для якіх бязвіз дзейнічае з 19 ліпеня 2024 года.
Лічбы ў любым разе ўражваюць. Асабліва калі глядзець на Літву і Латвію — атрымліваецца, што ў Беларусь нібыта з'ездзілі больш за 20% ад агульнай колькасці жыхароў Літвы і амаль 17% жыхароў Латвіі. І гэта з улікам пенсіянераў і немаўлят!
Натуральна, што кожны пяты грамадзянін Літвы не наведваў Беларусь за апошнія гады. Лічбы беларускіх памежнікаў адлюстроўваюць колькасць перасячэнняў мяжы грамадзянамі, а не колькасць гэтых грамадзянаў.
Пераканацца ў гэтым можна, калі параўнаць лічбы з літоўскімі. А там якраз лічаць і грамадзян, і паездкі.
Па даных літоўскага боку, у жніўні 2024 года грамадзяне Літвы перасякалі мяжу з Беларуссю праз пункты памежнага кантролю 10 020 разоў, але колькасць унікальных выездаў (а значыць, колькасць чалавек) склала 7 358.
Пры гэтым варта адзначыць, што цікавасць да паездак у Беларусь праз закрыццё чатырох з шасці пунктаў пропуску і забароны на ўвоз прадуктаў і іншых тавараў з Беларусі моцна знізілася. Так, напрыклад, у жніўні 2022 года грамадзяне Літвы перасеклі мяжу з Беларуссю 50 тысяч разоў, а ў жніўні 2023 года — 33 тысячы.
Да ўвядзення шэрагу новых абмежаванняў колькасць унікальных наведвальнікаў яшчэ больш адрознівалася ад лічбы ўнікальных выездаў, бо жыхары перш за ўсё літоўскага і латвійскага прыгранічча ездзілі ў Беларусь з камерцыйнымі мэтамі.
Так, напрыклад, за 2023 год 412 тысяч перасячэнняў мяжы забяспечылі 62 тысячы літоўцаў.
Калі глядзець беларускую статыстыку, можна было б падумаць, што ў Беларусь з'ездзіў кожны сёмы літовец. Рэальна ж — толькі адзін з пяцідзесяці.
Нагадаем, бязвіз дзейнічае да 31 снежня 2024 года, але можа быць падоўжаны, як гэта адбывалася ў папярэднія гады.
Цяпер чытаюць
Стала вядома, што за амерыканец нядаўна быў вызвалены з беларускай турмы2
Каментары