Аўстрыя ўжо 10 дзён не атрымлівае газ непасрэдна ад «Газпрама», але не адчувае праблем. Рэкордныя аб'ёмы электрычнасці ад ветравых электрастанцый і максімальная за дзесяцігоддзе гідрагенерацыя дазволяць камунальным службам Аўстрыі прапрацаваць распачаты ацяпляльны сезон з мінімальнымі патрэбамі ў газе, піша The Moscow Times.
Паспяховая адмова Аўстрыі ад газу можа стаць прыкладам для суседніх краін, якія могуць скараціць калектыўнае спажыванне газу, кампенсаваўшы страты электраэнергіі за кошт павелічэння яе імпарту ў агульнаеўрапейскіх сетках — у тым ліку з той жа Аўстрыі, сцвярджае Reuters.
Для «Газпрама», які і так ужо страціў рынкі Паўночнай Еўропы, гэта можа стаць дадатковым ударам. Хоць у гэтым годзе патрэбы Аўстрыі ў газе больш чым на 80% задавальняліся за кошт расійскага паліва, доля газу ў сукупнай электрагенерацыі апусцілася ніжэй за 6%, паводле даных энергетычнага аналітычнага цэнтра Ember.
Між тым, вецер даваў больш электрычнасці, чым газ, у 19 з 20 апошніх месяцаў. Гэта значыць, ужо ў мінулым ацяпляльным сезоне Аўстрыя ўпершыню вырабіла з дапамогай ветру больш электраэнергіі, чым з дапамогай газу.
Аналагічная сітуацыя назіраецца і ў гэтым сезоне, у тым ліку дзякуючы развіццю ветравой энергетыкі. У цэлым яна за 10 месяцаў гэтага года забяспечыла ў 2,5 разу больш электрагенерацыі, чым газ, а аб'ём вырабленай з ветру электрычнасці вырас на 18%.
Калі зімой 2024/2025 года хуткасць ветру будзе адпавядаць сезоннай тэндэнцыі (у краінах Цэнтральнай і Паўднёвай Еўропы гэтая хуткасць дасягае піку якраз у гэты час года), то ветрагенерацыя будзе перавышаць газавую на працягу ўсёй зімы, што прывядзе да зніжэння агульнага спажывання газу ў Аўстрыі ў такі важны для краіны момант, адзначае Reuters.
Акрамя таго, больш за 3000 гідраэлектрастанцый у Аўстрыі выпрацавалі за 10 месяцаў гэтага года на 17% больш электрычнасці, чым за аналагічны перыяд мінулага. Моцныя ападкі ў канцы 2023 — пачатку 2024 года напоўнілі рэзервуары да шматгадовых максімумаў. На долю гідрагенерацыі сёлета прыпала 68%, ветравой — 13%, яшчэ 10% дала сонечная.
Дзеянні Аўстрыі могуць стаць прыкладам для суседніх краін, якія таксама імкнуцца скараціць залежнасць ад імпарту газу. Акрамя таго, Чэхія, Венгрыя, Швейцарыя, Італія, Славенія і Славакія злучаныя з Аўстрыяй магутнымі электрасеткамі і могуць скараціць спажыванне газу за кошт імпарту яе электрычнасці.
Еўропа запатрабавала ад «Газпрама» больш за $20 мільярдаў за непастаўлены газ
Гэтыя электрастанцыі прыводзяцца ў дзеянне за сто секунд
Ці змогуць акіянскія хвалі стаць для чалавецтва невычэрпнай крыніцай энергіі?
Вялізныя «пясчаныя батарэі» — новая тэхналогія для захоўвання лішкаў сонечнай і ветраной энергіі
Сёлета ў Еўрасаюзе пабітыя рэкорды выкарыстання энергіі ветру і сонца
Каментары