Кітай рыхтуе місію для абароны Зямлі ад астэроіда. Што за ён і наколькі моцна пагражае планеце?
Еўрапейскае касмічнае агенцтва абвясціла, што астэроід 2024 YR4 стаў самым небяспечным аб’ектам у іхнім спісе назіраных пагроз. Паводле даных, касмічнае цела можа ўпасці на Зямлю праз 7 гадоў і па магутнасці выбуху знішчыць цэлы мегаполіс з мільёнамі жыхароў. Астэроід, папярэдне, праляціць над 10 краінамі, у тым ліку над Кітаем.
На фоне абнаўлення даных пра астэроід 2024 YR4 Кітай абвясціў аб стварэнні спецыяльнай каманды для абароны Зямлі ад касмічных пагроз. Ужо ў студзені краіна пачала набор спецыялістаў па планетарнай абароне, прапаноўваючы вакансіі ў сферы маніторынгу касмічных целаў і наладжвання сістэм ранняга папярэджання, паведамляе выданне South China Morning Post.
Адказнасць за гэты праект узяў на сябе кітайскі Цэнтр спецыяльных праектаў пры Дзяржаўным упраўленні абароннай навукі, тэхнікі і прамысловасці (SASTIND), які займаецца развіццём аэракасмічных тэхналогій. Установа ўжо заявіла пра намер распрацаваць новыя сістэмы назірання за касмічнай прасторай вакол Зямлі і падрыхтаваць інструменты для змены траекторыі касмічных целаў ці іх знішчэння на бяспечнай адлегласці ад планеты.
Астэроід 2024 YR4, як вынікае з назвы, быў выяўлены толькі ў мінулым годзе (ў канцы снежня), калі аддаляўся ад Зямлі, што ўскладняе збор дакладнай інфармацыі аб яго памерах і траекторыі. Але паводле апошніх даных Еўрапейскага касмічнага агенцтва і NASA, астэроід мае дыяметр каля 90 метраў, што супастаўна з вышынёй Статуі Свабоды ў Нью-Ёрку, і можа ўпасці на планету ў канцы 2032 года з верагоднасцю 2,2% (месяц таму гэты шанец ацэньваўся ў 1,2%).
Калі адбудзецца сутыкненне, то яно можа выклікаць выбух магутнасцю да васьмі мегатон — у 500 разоў магутней за атамную бомбу, скінутай на Хірасіму — што здольнае знішчыць цэлы мегаполіс з мільёнамі жыхароў ці выклікаць пры падзенні ў акіян велізарныя цунамі вышынёй да 100 метраў.
У групе рызыкі, паводле папярэдніх даных, знаходзяцца тэрыторыі 10 краін: Індыі, Пакістана, Бангладэш, Эфіопіі, Судана, Нігерыі, Венесуэлы, Калумбіі, Эквадора і Кітая. Таксама верагодна сутыкненне астэроіда з Месяцам, а не з Зямлёй. Але большасць навукоўцаў мяркуе, што касмічнае цела праляціць міма ці выбухне ў паветры без усялякай шкоды для планеты.
Ажыццявіць канчатковы аналіз траекторыі і памераў астэроіда можна будзе толькі падчас наступнага збліжэння з нашай планетай у 2028 годзе. Пры гэтым, нягледзячы на нізкую верагоднасць сутыкнення з 2024 YR4, ягонае адкрыццё нагадвае пра важнасць своечасовага выяўлення астэроідаў і стварэння эфектыўных тэхналогій для іх адхілення, піша SCMP.
Чалавецтва павінна ставіцца да такіх пагроз сур’ёзна, бо любое ігнараванне можа мець катастрафічныя наступствы, падкрэсліваюць навукоўцы.
Краіны Захаду таксама актыўна працуюць над праектамі для абароны Зямлі ад касмічных пагроз. NASA, адзін з лідараў у гэтай галіне, з 2016 года вядзе праграму маніторынгу і ранняга папярэджання аб небяспечных аб’ектах. Нядаўна агенцтва правяло місію DART, падчас якой касмічны апарат упершыню ў гісторыі паспяхова змяніў траекторыю астэроіда.
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары