У Грузіі камандзіры сілавікоў масава сыходзяць у адстаўку — сышоў і начальнік дэпартамента, які плануе разгоны
Высокапастаўлены камандзір спецназу суправадзіў паведамленне смайлікам са сцягам Еўрасаюза.
Начальнік упраўлення аператыўнага планавання дэпартамента асаблівых даручэнняў МУС Грузіі Іраклій Шаімшмелашвілі падаў у адстаўку.
Заяву аб звальненні па сямейных абставінах ён апублікаваў у сацсетках. Пры гэтым публікацыю высокапастаўлены камандзір спецназа суправадзіў смайлікамі са сцягамі Грузіі і Еўрасаюза, піша newsgeorgia.ge.
Дэпартамент, якім кіраваў Шаімшелашвілі, займаецца планаваннем непасрэдна разгонаў пратэсных акцый.
Пасля пастановы «Грузінскай мары» адмовіцца ад перамоваў аб уступленні ў ЕС да 2028 года і пачатку маштабных пратэстаў, публічна аб адстаўцы абвясцілі ўжо некалькі высокапастаўленых чыноўнікаў МУС. Былыя сілавікі сцвярджаюць, што колькасць звольненых за апошнія дні ідзе ўжо на дзясяткі.
Экс-начальнік батумскага ўпраўлення марской бяспекі берагавой аховы Гоча Берыдзэ распавёў, што разам з Шаішмелашвілі звольніліся чацвёра яго намеснікаў, а таксама 16 інструктараў спецназу, начальнік і 12 супрацоўнікаў службы псіхалагічнай падрыхтоўкі, а таксама ўся каманда аператараў вадамётаў — 16 чалавек.
TV Pirveli выказаў здагадку, што менавіта з гэтай прычыны ў апошнія дні пры разгоне акцый адбываліся памылкі. Напрыклад, камеры фіксавалі выпадкі, калі вадамёты накіроўвалі ў бок спецназу. Таксама журналісты дапускаюць, што менавіта праз «распачаты бунт» у ноч на сераду дэманстрантаў на Руставелі не разагналі ўпершыню за тыдзень.
Маштабныя пратэсты стыхійна пачаліся ў Грузіі 28 лістапада. Нагодай стала заява прэм'ера Іраклія Кабахідзэ. Ён абвясціў, што ўлады вырашылі да канца 2028 года не ўключаць у парадак дня пытанне перамоваў аб уступленні ў Еўрасаюз і адмовіцца ад усіх бюджэтных грантаў з боку супольнасці.
У Тбілісі мітынгі разганялі з дапамогай вадамётаў, гумовых куль, слёзацечнага газу і пярцовага спрэю. За тыдзень улады затрымалі больш за 300 чалавек. Большасць з іх збітыя сілавікамі. Сярод пацярпелых больш за паўсотні супрацоўнікаў СМІ, якія асвятлялі пратэсты. Міністэрства аховы здароўя дало справаздачу аб шпіталізацыі 134 пратэстоўцаў, 20 журналістаў і 50 супрацоўнікаў МУС.
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым1
Каментары