Латушка пра 30 мільёнаў еўра ад ЕС: Раней за размеркаванне адказваў Ягораў. 33% ішло на падтрымку рэлакаванага бізнэсу
Латушка хоча змяніць падыходы — сярод прыярытэтаў называе палітвязняў і культуру.
Еўрасаюз выдзеліў 30 мільёнаў еўра дапамогі дэмакратычным сілам Беларусі. Як яны будуць размеркаваныя?
Пра гэта ў эфіры праграмы «Обычное утро» расказаў кіраўнік Народнага антыкрызіснага ўпраўлення і намеснік кіраўніка Аб'яднанага пераходнага кабінета Павел Латушка.
Па яго словах, такую суму Еўрапейская камісія выдаткоўвае кожны год. Праўда, з 30 мільёнаў еўра дапамогі прыкладна палова застанецца ў еўрапейскіх фондаў і імплементатараў Еўрасаюза. Другая палова будзе накіравана дэмакратычным сілам Беларусі для рэалізацыі ўсіх напрамкаў іх актыўнасці. Аднак Латушка звяртае ўвагу, што з гэтай часткі грошай яшчэ трэба заплаціць падаткі, якія забіраюць 30-50% сродкаў.
Застаецца каля 10 мільёнаў еўра. Дык каму ж яны дастануцца?
«Буду шчырым, (…) мы не ведаем — ні Кабінет, ні Офіс Ціханоўскай, (…) ні Каардынацыйная рада, — якім чынам размяркоўваюцца гэтыя грошы.
Ёсць прыярытэтныя кірункі. І раней за гэта адказваў [тагачасны спікер Каардынацыйнай рады] Андрэй Ягораў, яго група. Вось гэты год мы едзем па шаблонах Ягорава. Ён гэту тэму вёў, ён быў лідарам. Так склалася. Калісьці гэта было рашэнне Офіса. Еўрасаюзу гэта падабалася.
Таму Ягораў акрэсліваў галоўныя кірункі разам з арганізацыямі, грамадзянскімі ініцыятывамі Беларусі. Адразу кажу, што не з палітычнымі структурамі. Мы ўвогуле не запрашаліся для выпрацоўкі рашэння. (…)
Зараз мы хочам змяніць гэты падыход, прымаць удзел у прыняцці гэтых рашэнняў. Бо, напрыклад, 33% ішло, наколькі я ведаю, на падтрымку бізнэсу, які рэлакаваўся. А бракавала сродкаў на палітвязняў. (…)
Я не супраць бізнэсу, але ў нас ёсць нацыянальная культура. З'ехалі тысячы дзеячаў нацыянальнай культуры, і мы нават не можам прафінансаваць купалаўцам пастаноўку спектакля».
Цяпер чытаюць
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы74
Каментары
Калі злезеце з грантавай іглы?