У Расіі абвінавацілі Малдову ў дыскрымінацыі расіян і ў скачванні да неанацызму. У Малдове адказалі

Што заявілі ў МЗС Расіі?

Міністэрства замежных спраў Расіі 20 снежня апублікавала даклад намесніка кіраўніка МЗС Сяргея Вяршыніна.

У ім сабралі інфармацыю аб «парушэннях правоў расійскіх грамадзян і суайчыннікаў» у 42 краінах і ў Косаве. Па версіі расійскага знешнепалітычнага ведамства, «праблема парушэння правоў выхадцаў з Расіі за мяжой на працягу апошніх гадоў толькі пагаршаецца намаганнямі заходніх краін».

У дакладзе гаворыцца, што Малдова «імкліва скочваецца да падтрымкі ідэалогій неанацызму і расавай дыскрымінацыі», а безальтэрнатыўны праеўрапейскі курс малдаўскага кіраўніцтва «мае на ўвазе поўны разрыў гістарычных і культурных сувязяў з Расіяй».

«Карыстаючыся падзеямі ва Украіне, «калектыўны Захад» працягвае настойлівыя спробы ўцягнуць Малдову ў кааліцыю заўзятых русафобаў. Нараўне з асуджэннем расійскай СВА [вайны ва Украіне] і заклікам да спынення баявых дзеянняў, малдаўскія ўлады на словах выказваюць прыхільнасць еўраінтэграцыі і канстытуцыйнаму нейтралітэту, аднак у рэальнасці адбываецца ўсталяванне таталітарнага рэжыму», — сцвярджае МЗС Расіі.

Расійскае ведамства лічыць, што тое, што адбываецца сёння ў Малдове, практычна цалкам супадае з тымі працэсамі, якія назіраліся ва Украіне.

«Рэжым М. Санду, падобна Ул. Зяленскаму, а да яго П. Парашэнка, «на шляху да еўраінтэграцыі» імкнецца таталітарнымі метадамі «адмяніць» цэлы этап гісторыі ўласнай краіны, знішчыўшы савецкую спадчыну, у тым ліку і любыя праявы культуры нацыянальных меншасцяў. У гэтых мэтах урад гэтай краіны прыкладае намаганні, каб разарваць гістарычныя сувязі паміж Расіяй і Малдовай, культуры якіх узаемна блізкія, і выкараніць усё рускае на сваёй тэрыторыі. Больш за тое, дзеля ўступлення ў ЕС (ці ў склад Румыніі, як лічаць многія эксперты) малдаўскія ўлады нават дэманструюць гатоўнасць знішчаць нацыянальную малдаўскую ідэнтычнасць краіны, выдаючы яе за румынскую», — гаворыцца ў дакладзе.

Міністэрства таксама паскардзілася на «наступленне на гістарычную памяць аб Вялікай Айчыннай вайне», «няроўнае становішча розных этнасаў», «насаджэнне ксенафобіі і нецярпімасці», «абмежаванне рускамоўнага вяшчання», «маніпуляванне свядомасцю падрастаючага пакалення» і многае іншае.

«Пасля пачатку Расіяй спецыяльнай ваеннай аперацыі [вайны ва Украіне] па дэнацыфікацыі і дэмілітарызацыі Украіны і абароне мірнага насельніцтва Данбаса ў Малдове адбыліся змены ў горшы бок для расійскіх грамадзян і рускамоўных жыхароў», — лічыць ведамства.

МЗС Малдовы адхіліў абвінавачанні

Міністэрства замежных спраў Малдовы 28 снежня абвергла абвінавачанні.

«Міністэрства катэгарычна абвяргае неабгрунтаваныя абвінавачванні, выкладзеныя ў штогадовым дакладзе МЗС Расіі, пра нібыта дыскрымінацыю расійскіх грамадзян і прасоўванне русафобіі на тэрыторыі Малдовы. Гэтыя сцвярджэнні беспадстаўныя і накіраваныя на раскол грамадства.

У адрозненне ад Расіі, Малдова цалкам паважае асноўныя правы і свабоды ўсіх грамадзян, незалежна ад іх нацыянальнасці, этнічнай прыналежнасці ці мовы. Малдаўскія ўлады строга прытрымліваюцца прынцыпаў прававой дзяржавы і міжнародных нормаў у галіне абароны правоў чалавека», — заявілі ў МЗС Малдовы.

Міністэрства таксама асудзіла правакацыйную заяву аб «падабенстве з украінскім сцэнарам».

«[Такія заявы] не спрыяюць умацаванню бяспекі ў рэгіёне, а толькі ўзмацняюць напружанасць і распальваюць нянавісць. Заклікаем грамадзян не паддавацца маніпуляцыям. (…) Малдова застаецца прыхільнай да прасоўвання мірнага дыялогу і канструктыўнага супрацоўніцтва, заснаванага на ўзаемапавазе і захаванні суверэнітэту і тэрытарыяльнай цэласнасці дзяржаў», — заключылі ў міністэрстве.

• 10
• 1
• 3
• 8
• 1
• 1
• 2
• 0