Моцны вецер пашкодзіў дахі, паваліў дзясяткі дрэваў — МНС расказала пра наступствы ўчорашняй буры
4 мая праз тэрыторыю паўднёвага і цэнтральнага рэгіёна Беларусі прайшоў навальнічны фронт, які прынёс моцны вецер з парывамі да 27 м/с. У выніку пацярпелі дрэвы, будынкі, тэхніка. На шчасце, абышлося без пацярпелых.
У Калінкавіцкім раёне ў вёсках Ліпава, Вязовіца і Хомічы вецер часткова сарваў шыферныя дахі з пяці сельскагаспадарчых будынкаў.
У вобласці зафіксавана 8 выпадкаў падзення дрэў на праезную частку дарог.
У Магілёўскай вобласці, якая асабліва моцна пацярпела ад стыхіі, зафіксаваныя значныя разбурэнні, піша МНС.
У аграгарадку Рэчкі (Магілёўскі раён) пашкоджаны дахі жылога дома і лазні.
У аграгарадку Міхалёва-1 пашкоджаны будынак для рамонту тэхнікі.
У вёсцы Прыбужжа Новае (Дрыбінскі раён) пашкоджаныя дахі зернясховішча, малочнатаварнай фермы, майстэрні, піларамы, хімсклада і цялятніка. Таксама разбіта шкленне ў трактары, камбайне і аўтобусе.
У Магілёўскай вобласці ратавальнікі выязджалі 14 разоў, каб прыбраць 22 паваленыя дрэвы ў Быхаўскім, Слаўгарадскім, Бабруйскім, Краснапольскім і Клічаўскім раёнах, а таксама ў горадзе Магілёве.
Каментары