«Замест «бялкі» напісана пра нейкіх вавёрак». Маладая настаўніца выкладае хімію на беларускай мове і расказвае, як яно
Маладая настаўніца хіміі і класная кіраўніца Ната вядзе свае заняткі па-беларуску. Дзяўчына прыдумляе для дзяцей цікавыя практыкаванні і інтэрактыўныя ўрокі, а ў тыктоку распавядае, ці складана гэта — быць беларускамоўнай настаўніцай у сучаснай школе.
У тыктоку дзяўчына кажа, што падрыхтаваць занятак на беларускай мове патрабуе часу — шмат што трэба перакладаць з рускай мовы ці рабіць матэрыялы для дзяцей самастойна.
«Таму што настаўнікаў, якія выкладаюць на беларускай мове, значна менш, чым тых, хто выкладае на рускай», — тлумачыць Ната.
Беларуска стараецца падыходзіць да заняткаў крэатыўна — стварае ўрокі праз інтэрактыўныя анлайн-платформы, збірае інфармацыю па схемах і табліцах. У адным з ролікаў яна распавяла, што прайшла курсы, дзе вучылася досведу іншых настаўнікаў.
У роліках дзяўчына і жартуе: напрыклад, пра тое, як дзеці блытаюць пераклады некаторых тэрмінаў:
«Твой твар, калі ў чарговы раз вучань здае сшытак, а там замест «бялкі» напісана пра нейкіх вавёрак».
Як класная кіраўніца Ната арганізоўвала для дзяцей занятак пра падарожжы па Беларусі. Пасля прэзентацыі аб беларускіх абласцях і мясцовых славутасцях яны стваралі свае ўласныя маршруты для вандровак.
А за актыўнасць падчас уроку дзяўчына выдавала дзецям надрукаваныя валошкі — хто сабраў больш, атрымліваў шакаладку. Дзеці таксама размалёўвалі паштоўкі — з выявамі Мінска.
«Я ганаруся тым, што выкладаю на беларускай мове. Канечне, мае веды не супер ідэальныя, і я імкнуся пашыраць свае веды і развіваць вуснае маўленне», — кажа яна.
У каментарыях людзі пераважна падтрымліваюць настаўніцу, кажуць, што ганарацца ёй і дзякуюць за важную працу — якую, пішуць, варта адзначаць большым заробкам.
Але не ўсе разумеюць, па якой прычыне яна гэта робіць: «Адно пытанне: навошта? Універы ў нас усе на рускай, праца таксама», «А навошта хімія на беларускай мове?».
-
«Я заўсёды быў праўкраінскім чалавекам». Беларус амаль 20 гадоў працаваў у Маскве — вось што з ім адбылося пасля 2022‑га
-
У Беларусі — 365 экстрэмісцкіх фармаванняў і арганізацый
-
«Бываюць проста болевыя запоі. Калі ты з болю не вылазіш…». Галіна Казіміроўская — пра барацьбу з анкалогіяй, хіміятэрапію і тое, чаму не ўмее прасіць дапамогі
Цяпер чытаюць
Пяць дзён, 60 удзельнікаў, саўна, більярд і крыкі адно на аднаго. Расказваем, як прайшла закрытая «гульня Мацкевіча»59
Каментары