«Я не ведаю, якое ў Беларусі грамадзянства правільнае». Расійскі брамнік гуляў за зборную Беларусі без пашпарта
Масквіч Сяргей Бальшакоў паспеў правесці чатыры матчы за зборную Беларусі. Пры гэтым грамадзянства ён так і не атрымаў.
Сяргей Бальшакоў нарадзіўся ў Маскве. У маладосці ён паспеў трохі згуляць у Канадзе, а потым вярнуўся на радзіму. Прабрацца ў галоўную расійскую лігу КХЛ яму не ўдалося, ён бадзяўся па другім па моцы чэмпіянаце ВХЛ, пакуль пяць гадоў таму не апынуўся ў Беларусі.
У мінскім «Юнацтве» ён стаў адным з найлепшых брамнікаў чэмпіянату краіны, нават атрымаў невялікі шанец у «Дынама» ў КХЛ. Потым на паўтара года ізноў з'ездзіў у Расію і вярнуўся — ужо ў жлобінскі «Металург». Заўважылі брамніка і трэнеры зборнай Беларусі: да апошняга часу ФХБ любіла натуралізаваць расіян. Яго выклікалі на пару таварыскіх турніраў і далі правесці ў форме зборнай тры матчы, у якіх прапусціў 10 шайбаў.
Але, як аказалася, беларускае грамадзянства Бальшакоў не атрымаў. Ён увогуле не ведае, «якое грамадзянства ў Беларусі правільнае», пiша Betnews.
«У мяне пашпарта няма беларускага. Я нават не ведаю, як яно правільна. Я ўжо колькі гадоў у Беларусі і не разумею, якое тут правільнае грамадзянства, якое няправільнае і як тут увогуле ў мяне гэта атрымалася.
Я хацеў атрымаць беларускі пашпарт, каб выступаць за зборную. Але мы не ўдзельнічаем ні на чэмпіянаце свету, ні на Алімпіядзе, ні на іншых міжнародных буйных турнірах. А на, так бы мовіць, маленькіх, як мне сказалі, дастаткова дазволу на жыхарства. Напрыклад, калі ў Славенію мы едзем, можна было ехаць без [беларускага] пашпарта. Ці на тур [у маі 2024-га] таксама можна было ехаць без грамадзянства», — распавёў Бальшакоў.
Брамнік жыве ў Беларусі па ДНЖ, які нядаўна падаўжаў на дзесяць гадоў.
«Не ведаю, ці ёсць мне сэнс атрымліваць пашпарт. Калі я застануся ў экстралізе, то, вядома, камандзе было б выгадна, каб я стаў беларусам, каб не плаціць легіянерскі ўзнос. Але калі ніхто гэтага не робіць — значыць, нікому гэта не цікава», — разважае Бальшакоў.
Пры гэтым расіянін гатовы гуляць за зборную Беларусі. Але не ведае, як быць.
«За зборную заўсёды класна згуляць. Ты прадстаўляеш гонар краіны. Што можна яшчэ сказаць? Толькі я не грамадзянін Беларусі. Я рэзідэнт, але грамадзянства ў мяне няма беларускага. Таму я не разумею, што з гэтым рабіць», — адзначыў Бальшакоў.
На неафіцыйных турнірах часта не патрабуецца, каб ва ўсіх гульцоў было грамадзянства краіны, якую яны прадстаўляюць. А ад чэмпіянатаў пад эгідай Міжнароднай федэрацыі хакея ўсе беларускія зборныя адхілены з-за падтрымкі, якую аказваюць улады краіны Расіі ў вайне супраць Украіны.
Каментары
Эти две сборные всё равно только между собой играют. Какая разница какой паспорт.