Вядоўца ранішняга шоу «Обычное утро» Канстанцін Каверын у новым выпуску ТОКу расказаў, чаму не хоча вяртацца ў Беларусь, ці сумуе па Мінску і куды ўсё ж хацеў бы прыехаць.
«Я не хачу вяртацца. Я і туды не вярнуся ніколі. Таму што я не хачу хадзіць па адных вуліцах з гэтымі ўпырамі, якія білі, збівалі, гвалтавалі людзей.
Я не хачу хадзіць па адных вуліцах, сядзець за суседнім столікам у кавярні з людзьмі, якія пагражалі бацькам адабраць дзяцей. Я гэтага не хачу», — заявіў Каверын у размове.
Настасся Роўда заўважыла, што такіх людзей абсалютная меншасць і з імі можна ўвогуле ніколі не перасекчыся.
«Ну не. Я не хачу ўсяго гэтага. Я не хачу вышукваць, пытацца. Вось мы ўвечары садзімся ў кавярні, за суседнім столікам сядзяць два паголеныя хлопцы. Я не хачу [пытацца]: «Хлопцы, вы ў АМАПе служылі, не служылі?» Я гэтага не хачу, проста не хачу.
І ім будзе лягчэй жыць без мяне, і мне будзе лягчэй жыць без іх», — адказаў Каверын.
Канстанцін запэўніў, што для сябе гэтае пытанне вырашыў цвёрда. Калі з’явіцца магчымасць, ён прыедзе ў Беларусь, каб наведаць могілкі. Але не думае, што такая магчымасць з’явіцца хутка.
«Калі я дажыву да гэтай магчымасці, вядома, з’езджу. Але не… Жыць я буду тут».
На пытанне Роўды, ці сумуе ён па Мінску, Каверын адказаў, што не.
«Не, вось шчыра. Па Мінску — не. Я сумую па сваім маленькім гарадку Глыбокае».
У горад, у якім ён вырас, паводле слоў Канстанціна, ён бы з’ездзіў «на пару дзён, на тыдзень».
«Адпачынак правесці — і ўсё. І назад», — запэўніў Каверын.
Канстанцін Каверын — журналіст і шоўмен. Раней ён вёў забаўляльныя праграмы на БТ, працаваў вядоўцам на радыё Unistar і дыктарам на «Барысаў-Арэне». У 2020‑м асудзіў гвалт сілавікоў і катаванні на Акрэсціна, выказаў сваё захапленне стойкасцю беларускіх жанчын. Праз палітычную пазіцыю Каверын страціў працу на радыё і ў БАТЭ. Летам 2022 года ён разам з сям'ёй з’ехаў з Беларусі ў Варшаву, дзе цяпер жыве і вядзе ютуб-шоу «Обычное утро».
Каментары