Украінскі камандуючы асабіста прыехаў у горад, пра захоп якога заявіў Пуцін
Камандзір 3‑га армейскага корпуса УСУ Андрэй Білецкі асабіста прыехаў у Святагорск, тым самым абвергнуўшы заяву прэзідэнта Расіі і расійскіх вайскоўцаў пра захоп горада.
2 верасня Уладзімір Пуцін заявіў, што расійская армія нібыта захапіла Святагорск. Яго словы распаўсюдзілі як факт расійскія дзяржаўныя і прапагандысцкія медыя.
Аднак заяву Пуціна не пацвярджала ніводная з асноўных карт баявых дзеянняў. Паводле даных DeepState на момант заявы, найбліжэйшыя расійскія пазіцыі знаходзіліся прыкладна за 9,5 кіламетра ад горада.
Цяпер Білецкі асабіста прыехаў у горад.
«Я хачу звярнуцца да расійскага вайсковага і вайскова-палітычнага кіраўніцтва. Вы здымайце свае клоўнскія насы, гэтыя парыкі рознакаляровыя, не выглядайце дурнямі. <…> Ну, бачна, што мы ў бронежылеце, але шпацыраваць можна без усялякіх праблем. Дзень, як бачыце, ціхі, прыгожы. Машына во едзе цывільная», — сказаў ён.
Паводле яго заявы, Святагорск знаходзіцца ў паласе абароны 60‑й асобнай механізаванай брыгады 3‑га армейскага корпуса.
«Гэта тылавая зона нашага корпуса. Тут усё выдатна», — сказаў Білецкі.
Каментары