Начальнік Штаба абароны Літвы пра будучыя беларуска-расійскія вучэнні: Пакуль мы не бачым ніякіх сюрпрызаў
Начальнік Штаба абароны генерал-лейтэнант Літвы Рымігіюс Балтрэнас сцвярджае, што няма ніякіх прыкмет таго, што будучыя вайсковыя вучэнні «Захад-2025» уяўляюць большую пагрозу, чым звычайна, піша Delfi.lt.
«Напэўна, ніхто не можа адмаўляць гэтыя дрэнныя і злыя намеры Расіі і Беларусі, яны засталіся, і мы бачым, што адбываецца. Аднак (вучэнні) «Захад» не з’яўляецца больш маштабнымі і пагрозлівымі па сваім аб’ёме, чым у 2021 годзе», — заявіў Р. Балтрэнас журналістам у Штабе абароны ў аўторак.
Прэзідэнт Украіны Уладзімір Зяленскі неаднаразова заяўляў, што вучэнні «Захад» могуць ствараць рызыку гібрыдных пагроз на мяжы Польшчы або краін Балтыі. Аднак Р. Балтрэнас запэўніў, што літоўская і саюзніцкая разведка пакуль не прадбачыць падобных рызык.
«І разведка НАТА, і літоўская разведка выконваюць свае функцыі, сістэмы апавяшчэння працуюць. На дадзены момант мы не прадбачым ніякіх сюрпрызаў», — падкрэсліў генерал.
Плануецца, што ў сумесных расійска-беларускіх вучэннях прыме ўдзел больш за 13 тыс. вайскоўцаў. На пытанне аб тым, ці могуць гэтыя салдаты рыхтавацца да баявых дзеянняў ва Украіне, начальнік Штаба абароны выказаў сумнеў у такой магчымасці.
«Ідзе гаворка пра 13 тыс. (…). Гэта (лічба) пакуль застаецца. Разумеючы, што адбываецца ва Украіне, Расія і Беларусь не могуць сабе дазволіць вялікіх маштабаў, бо гэта проста фізічна немагчыма», — сказаў Р. Балтрэнас.
Масква і Мінск у верасні 2025 года плануюць правесці маштабныя сумесныя вайсковыя вучэнні «Захад». Афіцыйнымі мэтамі апошніх з’яўляюцца адпрацоўка сумесных абарончых і наступальных дзеянняў, удасканаленне ўзаемадзеяння ўзброеных сіл, а таксама праверка гатоўнасці вайскоўцаў да розных сцэнараў бяспекі.
Цяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2222
Каментары