Украіна будзе байкатаваць чэмпіянат свету па дзюдо з-за ўдзелу ў ім беларусаў
Украінская федэрацыя дзюдо прыняла рашэнне не ўдзельнічаць у чэмпіянаце свету, які адбудзецца ў чэрвені ў Будапешце. Прычына — рашэнне Міжнароднай федэрацыі дзюдо (IJF) дапусціць беларускіх спартоўцаў да ўдзелу ў міжнародных спаборніцтвах з дзяржаўнай сімволікай — гімнам, сцягам і гербам.
Украінскі бок звярнуўся ў IJF з просьбай пацвердзіць або абвергнуць гэтую інфармацыю, і атрымаў афіцыйнае пацвярджэнне. У адказе адзначалася, што федэрацыя, маўляў, імкнецца, каб спорт заставаўся пляцоўкай для дыялогу і яднання, а не для варожасці.
Украінская федэрацыя рашуча асудзіла пазіцыю IJF, назваўшы яе несправядлівай і такой, што супярэчыць прынцыпам адказнасці і салідарнасці ў свеце спорту. У выніку прынята рашэнне адмовіцца ад удзелу ў чэмпіянаце самім.
Праўда, не ўсе ўкраінскія спартсмены лічаць гэта рашэнне правільным. Лідарка зборнай Украіны Юлія Курчанка ў каментары для выдання «Трыбуна» заявіла, што гэта «крыху сумна, таму што [на чэмпіянат] заяўленыя толькі два беларусы ў катэгорыі да 90 кг, з якімі мы б ніяк не сустрэліся — у нас няма ў камандзе нікога ў гэтай катэгорыі».
«Таму лічу гэтае рашэнне крыху несправядлівым у адносінах да нас. Хацелася б выступіць, падняць наш сцяг. Думаю, гэта цяпер вельмі важна для нашай краіны», — дадала Курчанка.
Чэмпіянат свету па дзюдо ў 2025 годзе пройдзе з 13 па 20 чэрвеня ў сталіцы Венгрыі Будапешце.
Раней Літва і Латвія адмовіліся прымаць нацыянальную зборную Беларусі на чэмпіянаце Еўропы па футзале 2026 года, у сувязі з чым УЕФА разглядае магчымасць пераносу гэтага турніру ў іншую краіну.
Цяпер чытаюць
«Дыялект падазроны». Спявак Сярога прыйшоў на расійскае рэаліці і сабраў усіх хэйтараў2
Каментары