Месцам сустрэчы было «Зэман-кафэ» на Елісейскіх палях.
Некалькі гульцоў французскай зборнай абвінавачваюцца ў сэксе з непаўналетнімі прастытуткамі. Двое з іх ужо дапытаныя. Скандал можа адбіцца не толькі на складзе зборнай на Кубку свету ў Паўднёвай Афрыцы, але і на іміджы французскага футбола.
Пра скандал паведамілі ў суботу тэлеканал M6 і газета L’Equipe. Інфармацыя датычыла шэрагу ключавых гульцоў каманды. У нядзелю ў французскіх СМІ з’явіліся імёны Франка Рыберы («Баварыя») і Сіднэя Гаву («Ліён»). Адвакат Рыберы кажа, што яго кліента дапытвалі толькі як сведку.
Абвінавачанні Гаву аспрэчыў яго агент, які кажа, што футбаліст не пераступаў парогу«Зэман-кафэ» — бару, дзе адбываліся сустрэчы з прастытуткамі. Французская прэса адразу ўспомніла, што футбаліст — не нявіннае дзіця. Паўтара году таму Гаву быў арыштаваны за кіраванне машынай у нецвярозым стане. Ноч ён правёў у камеры, а потым публічна папрасіў прабачэння ў клуба і заўзятараў.
У нядзелю з’явілася інфармацыя яшчэ пра двух футбалістаў. Гэта Карым Бензэма («Рэал») і Хатэм Бэн Арфа (марсэльскі «Алімпік»).
Гэтая інфармацыя ўсплыла падчас расследавання справы пра сутэнёрства ў папулярным сярод футбалістаў начным клубе ў раёне Елісейскіх палёў. Парыжская паліцыя выявіла, што сярод кліентаў былі гульцы футбольнай зборнай Францыі. Дарэчы, высветлілася, што адна з жанчын, якія працуюць у клубе, была няпоўнагадовай.
За сэкс з няпоўнагадовымі ў Францыі перадугледжанае пакаранне трыма гадамі турмы і штрафам у памеры 45 тысяч еўра.
Справа была перададзеная ў пракуратуру. Неўзабаве пачнецца судовы працэс. Французская федэрацыя футболу ад каментароў устрымліваецца.
Скандал асвятляецца і ў прэсе за межамі Францыі. Ангельскія і іспанскія газеты мяркуюць, што калі ўсё апынецца праўдай, гэта будзе вялікі ўдар па іміджы французскага футболу і можа паўплываць на склад каманды ў Кубку свету 2010 году.
Былога супрацоўніка контрразведкі КДБ арыштавалі за здраду дзяржаве9
Каментары