У Польшчы дапамогу выплачваюць амаль на 25 тысяч беларускіх дзяцей — за год іх стала крыху больш
Па колькасці сярод замежнікаў беларускія дзеці саступаюць толькі ўкраінцам, пiша Business Insider.
У першым паўгоддзі 2025 года ў Польшчы дапамогу «800+» выплачвалі на 24,7 тысячы беларускіх дзяцей. За год іх стала амаль на 200 чалавек больш. Усяго беларускім дзецям выдзелілі 117,5 мільёна злотых (прыкладна 27,5 мільёна еўра).
У гэтай статыстыцы ўлічваюцца дзеці, у бацькоў якіх няма польскага грамадзянства. Гэта значыць, што на самой справе беларускіх дзяцей у Польшчы пражывае яшчэ больш — мігранты з польскімі каранямі актыўна атрымліваюць грамадзянства і пераходзяць у іншую статыстычную калонку.
Па колькасці сярод замежнікаў беларускія дзеці саступаюць толькі ўкраінцам — 315 500 дзяцей з гэтай краіны атрымлівалі дапамогу ў першым паўгоддзі. Па статыстыцы іх стала на дзесяць тысяч менш, чым у мінулым годзе. Пасля беларусаў у спісе ідуць румыны (7000 дзяцей), расіяне (4000) і індусы (2800 дзяцей).
Дапамога «800+» выплачваецца на дзяцей штомесяц ад нараджэння і да 18 гадоў. 800 злотых — гэта прыкладна 187 еўра. Пакуль дапамогу плацяць на ўсіх дзяцей, якія пражываюць у Польшчы і вучацца ў польскіх установах адукацыі.
Але прэзідэнт краіны Караль Наўроцкі прапанаваў плаціць толькі на тых дзяцей, чые бацькі афіцыйна працуюць і плацяць унёскі ў фонд сацстрахавання. Гэта патрабаванне прэзідэнт звязаў з агульнай падтрымкай украінскіх уцекачоў.
Каментары