Супрацоўнік заказніка на вачах дзяцей жорстка забіў дубінай ваўка. Выпадкам зацікавіліся ў Мінпрыроды
Ведамства пачало праверку па факце жорсткага абыходжання з жывёлай у рэспубліканскім заказніку «Выганашчанскае».
На днях у сацсетках з'явілася відэа на якім у цёмны час сутак насустрач групе людзей выходзіць худы і кульгавы воўк, больш падобны да ваўчаняці. Ніякай агрэсіі параненая жывёла не праяўляла.
Калі ён набліжаецца да мужчыны, той з размаху наносіць яму ўдар па галаве вялікай дубінай, пасля чаго жывёла адразу падае на зямлю. Мужчына наносіць яшчэ некалькі дзясяткаў удараў, каб дабіць воўка. На фоне чутны дзіцячы смех.
«Прыехалі егеры. Людзі паўтары гадзіны сядзелі на даху — баяліся ваўкоў. Прыехаў Іваноў — палкай забіў. Толькі нікому не кажыце. Усё, выклікайце ахову прыроды, няхай бяруць экспертызу», — гаворыць мужчына ў канцы.
Мужчынам, які жорстка забіў ваўка, аказаўся супрацоўнік рэспубліканскага заказніка «Выганашчанскае» Аляксандр Аляксандравіч Іваноў.
У сацсетках патрабуюць звольніць супрацоўніка, які забіў жывёлу «на вачах і пад смех дзяцей».
Пасля публікацыі відэа Міністэрства прыродных рэсурсаў і аховы навакольнага асяроддзя Беларусі распачала праверку па факце жорсткага абыходжання з жывёлай на тэрыторыі рэспубліканскага заказніка «Выганашчанскае».
У ведамстве адзначаюць, што падзея знаходзіцца на кантролі, а «дзеянням супрацоўніка заказніка будзе дадзена адпаведная прававая ацэнка».
Пасля гэта з'явілася відэа, у якім дырэктар заказніка Сяргей Габец тлумачыць паводзіны свайго падначаленага, які забіў ваўка.
Па словах Габца, 30 жніўня наведавальнікі паведамілі егерскай службе пра дзікага звера, што «неадэкватна сябе паводзіў»: бегаў па аграсядзібе, грыз лодку, перавярнуў вулей. Калі супрацоўнікі выехалі, звера не знайшлі, але пазней адзін з іх паведаміў, што воўк нібыта напаў на яго і ў выніку жывёлу забілі.
«Супрацоўнік паступіў вельмі правільна і вельмі граматна, бо гэты воўк мог прынесці вельмі шмат шкоды, фактычна шкоды не толькі людзям, але і заразіць усю мясцовасць гэтым шаленствам. Не кожны чалавек мог быць такім смелым, каб напасці на ваўка, таму не так проста гэта ўсё. Але калі воўк галодны і шалёны, то толькі такім шляхам яго можна ліквідаваць», — заявіў кіраўнік заказніка.
Заказнік «Выганашчанскае» — найбуйнейшы ў Беларусі балотны комплекс плошчай больш за 55 тысяч гектараў. Ён быў створаны ў 1968 годзе дзеля захавання азёрна-балотных экасістэм і аховы рэдкіх відаў флоры і фаўны, занесеных у Чырвоную кнігу.
Каментары