Нахабны мядзведзь граміць пасекі ў Лагойскім раёне. Тамтэйшы люд ўжо і не ведае, як ратавацца
Незвычайная гісторыя адбылася ў вёсцы Селішча. Сюды да мясцовых жыхароў стаў пастаянна прыходзіць мядзведзь. Таптыгу прыцягваюць вуллі сялян, а ў вёсцы іх дастаткова. Толькі пару дамоў у Селішчы не займаюцца пчалярствам.
У вёсцы, дзе гаспадарыць мядзведзь, пабываў карэспандэнт «Мінскай праўды».
Дабрацца да Селішча няпроста. Знаходзіцца гэты населены пункт, як раней казалі ў народзе, у мядзведжым вугле. Калі не ведаеш дарогі, можна нават заблукаць.
У вёсцы ветліва сустракае Валянціна Сцяпанава. Менавіта гэта мясцовая жыхарка забіла трывогу наконт з’яўлення мядзведзя.
— Мішка пачаў да нас заходзіць прыкладна паўтары тыдні таму. Асабіста ў мяне вулляў няма, але да суседзяў ён завітаў не раз. Напярэдадні вашага прыезду мядзведзь пабываў у гасцях у майго брата Віктара Вольскага. Яго ўчастак мяжуе з маім.
— Учора каля 20:40 я пачула, як забрахаў мой абака. Гэта ён пачуў госця з лесу. Раніцай я знайшла два разбураныя вуллі і сляды лап на бульбяным надзеле на ўчастку брата, — распавяла Валянціна Сцяпанава.
У пацвярджэнне яе слоў праходзім на суседні ўчастак і знаходзім рамкі з вулляў, што ляжаць на узараным бульбяным надзеле. Побач бачны сляды. Мяркуючы па іх, мядзведзь невялікі.
— Усяго за гэтыя дні ў нашай вёсцы пашкоджана восем вулляў. Мядзведзь настолькі абнаглеў, што аднойчы нават прайшоўся па вёсцы і павярнуў у бок могілак.
Яго бачылі суседзі. Калі мы зразумелі, што маем справу з мядзведзем, то першай справай я паведаміла пра гэта ў МНС. Адтуль мяне перанакіравалі ў міліцыю. Міліцыянеры прыехалі на месца аператыўна. Правялі агляд, апыталі нас і сказалі, што ў такіх выпадках павінна працаваць спецыяльная камісія па аказанні дапамогі дзікім жывёлам пры райвыканкаме. Мы звязваліся з галоўным ляснічым ГЛХУ «Краснасельскае». Іх спецыяліст таксама адзначыў неабходнасць працы вышэйзгаданай камісіі, — падсумавала жанчына.
У размову ўключыўся сусед Сяргей Каськоў, які бачыў мядзведзя.
— Я бачыў сілуэт мядзведзя. У карку ён невялікі, каля 70 сантыметраў. Спецыялісты сказалі, што, верагодна, яму каля 4‑х гадоў. Падчас першага сутыкнення я адганяў мядзведзя, б’ючы па тазіку лыжкай. У мяне ён паласаваўся з двух вулляў. Потым я паставіў электрапастуха і светлавую сігналізацыю, распальваў побач з пасекай вогнішчы. Тады набегі спыніліся. Выходзіў ён не позна, пасля васьмі вечара, — распавёў Сяргей Каськоў.
Дарэчы, яшчэ адзін мясцовы жыхар вырашыў абараніць свае вуллі, уключаючы на ноч радыё.
— Калі ўключаю радыё, то кажу сваёй суседцы Валянціне, што зрабіў для яе дыскатэку. А наогул мядзведзь у нас выхаваны. Ходзіць акуратна і шмат не бярэ, — жартуе мясцовы жыхар.
Камісія па аказанні дапамогі дзікім жывёлам, у якую ўвайшлі прадстаўнікі аддзела па надзвычайных сітуацыях, РАУС, лясніцтва «Краснасельскае», ветстанцыі і інш., сёння будзе працаваць у Селішчы. Спецыялісты правядуць агляд месца здарэння і прымуць адпаведныя меры.
«Яна не выглядала шчырай, была ў масцы». Паўлючэнка пра сустрэчу Калеснікавай з беларускімі журналістамі12
Каментары