«Пражыла трое сутак і кінула на 450 рублёў». Мінчук нарваўся на хітрую кватарантку
Дзмітрый здае сваю аднапакаёўку на 33 квадраты з тэрасай і асобным уваходам у «Мінск-Свеце» не першы месяц і кажа, што з такой сітуацыяй сутыкнуўся ўпершыню.
У той дзень усё было як звычайна. Раніцай 5 кастрычніка яму на WhatsApp прыйшло паведамленне з незнаёмага нумара: дзяўчына планавала зняць жыллё на дзве ночы. Пражыванне на гэты тэрмін абыходзілася ёй у 300 рублёў. Па шчаслівай выпадковасці ў гэты і наступныя дні аднапакаёўка аказалася свабоднай, піша Onliner.by.
— Я ўдакладніў усю інфармацыю і забраніраваў для яе кватэру з 5 па 7 кастрычніка. Растлумачыў, што ў мяне бескантактнае засяленне: госці засяляюцца самі, у дзвярах стаіць электронны замок. Я працую як самазаняты па кароткатэрміновай арэндзе, таму магу прымаць аплату як наяўнымі, так і пераводам на картку. Кацярына атрымала рэквізіты і паабяцала перавесці грошы адразу пасля заезду.
— Я не турбаваў у выхадны дзень, але, калі шчыра, у мяне з'явілася лёгкае хваляванне, бо звычайна госці аплачваюць альбо да, альбо адразу пасля засялення. Увечары ў панядзелак я зноў нагадаў ёй, што грошай дагэтуль няма і варта было б звязацца з банкам, удакладніць пра перавод, тым больш да высялення засталося зусім нічога. Яна паабяцала вырашыць пытанне, але напісала толькі ў аўторак раніцай кароткае: «Я заснула», — працягвае ўладальнік аднапакаёўкі.
Сам Дзмітрый у гэты дзень з'ехаў у камандзіроўку, таму забраць грошы асабіста не мог. Ён прапанаваў Кацярыне перад выездам пакінуць 300 рублёў за арэнду ў паштовай скрыні.
«Пры гэтым папярэдзіў яе: калі грошы прыйдуць на рахунак, я вярну іх назад. Яна пагадзілася і адразу папрасіла падоўжыць ёй пражыванне яшчэ на адзін дзень, да серады», — працягвае мужчына.
— У аўторак, будучы ў камандзіроўцы, вырашыў зайсці ў адзін з дадаткаў і прабіць яе нумар. Там знайшоў каментары аб тым, што чалавек кідае араэндадаўцаў з аплатай. Мае падазрэнні ўзмацніліся, таму ў той жа дзень, вярнуўшыся з камандзіроўкі, я адразу паехаў на кватэру.
Кацярына адчыніла дзверы. Я патлумачыў, што мне патрэбны грошы і прапанаваў схадзіць з ёй у банкамат, зняць наяўныя з карткі. Спярша яна стала казаць, што дрэнна сябе адчувае, потым нібы як пагадзілася і папрасіла яе пачакаць. Праз хвілін 40 стала слёзна ўмольваць увайсці ў яе становішча, бо грошай у яе пакуль няма, але яна абавязкова іх знойдзе і заўтра разлічыцца.
У сераду раніцай Дзмітрый зноў звязаўся з дзяўчынай. Тая адказала, што грошы ў яе і прама зараз яна пакладзе іх у паштовую скрыню. Мужчына вырашыў падстрахавацца і папрасіў Кацярыну зняць відэа. Па словах уладальніка аднапакаёўкі, яна праігнаравала просьбу і скінула толькі фота паштовай скрыні.
— Я ўжо разумеў, што яна хоча зліцца, таму тут жа выехаў на кватэру. Праз хвілін 20 я ўжо быў на месцы, і, як вы можаце здагадацца, яе і след прастыў. Грошай у паштовай скрыні таксама, зразумела, не было. Я спрабаваў з ёй звязацца, тэлефанаваў на мабільны тэлефон. Яна ні разу не адказала, толькі скідала. Крыху пазней напісала ў WhatsApp, што сёння аддасць мне 450 рублёў, але грошай я так і не ўбачыў. Магчыма, для кагосьці гэтая гісторыя стане павучальнай і зможа засцерагчы іншых арандадаўцаў ад гэтай гора-кватаранткі, — падсумаваў Дзмітрый.
Журналісты паспрабавалі звязацца з Кацярынай некалькі разоў, каб пачуць яе пазіцыю, але дзяўчына не зняла трубку.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары